Xarici xəbərlər
ABŞ İrana qarşı müharibədə “qələbə” elan etməyə hazırlaşır?
ABŞ Prezidenti Donald Tramp İranla münaqişəni yeni nüvə sazişi imzalanmadan başa çatdırma ehtimalını nəzərdən keçirir.
Crossmedia.az xəbər verir ki, bu barədə "The Wall Street Journal" (WSJ) məlumat yayıb.
Nəşrin yazdığına görə, Tramp qapalı söhbətlər zamanı İranla bağlı hərbi məqsədlərin artıq yerinə yetirildiyini və hazırda əsas diqqətin Hörmüz boğazından gəmiçiliyin bərpasına yönəldiyini bildirib.
ABŞ rəsmilərindən birinin sözlərinə görə, İranın gəmiçiliyə mane olmaqda davam etməsi halında Vaşinqton hərbi gücdən istifadə imkanını da nəzərdən keçirə bilər.
WSJ qeyd edir ki, Tramp son həftələr ərzində İranın Hörmüz boğazını tam açması halında müharibədə qələbə elan etməyə zəmin hazırlayıb.
Məlumata görə, ABŞ Prezidenti yaxın çevrəsi ilə söhbətlərində Tramp hakimiyyətdə olduğu müddətdə İranın nüvə fəaliyyətini əvvəlki səviyyədə bərpa etməsinin çətin olacağını deyib.
Bu arada, ABŞ-in vitse-prezidenti Cey Di Vens avqustun 8-də İranla aparılan danışıqlarda son günlər müəyyən irəliləyiş əldə edildiyini açıqlayıb. Onun sözlərinə görə, Tehran münaqişəni başa çatdırmaq istəyir. Bununla belə, Vens İranın Vaşinqtonu qane edəcək addımlar atmağa hazır olub-olmadığının hələ də açıq sual olaraq qaldığını bildirib.
İranın xarici işlər naziri Abbas Əraqçi isə avqustun 9-da ABŞ-yə hazırda danışıqların aparılmadığını deyib.
İran ətrafındakı vəziyyət Rusiya Prezidenti Vladimir Putinlə Donald Trampın telefon danışığında da müzakirə olunub. Putin ABŞ və İsrailin hərbi əməliyyatlara keçməsinin dünya üçün ağır nəticələr doğura biləcəyi barədə xəbərdarlıq edib.
19:47 09.08.2026
Oxunuş sayı: 51
