Bakı-İrəvan xəttində yeni mərhələ - ABŞ Orta Dəhlizin inkişafına milyonlar ayırır
ABŞ hökuməti Transxəzər Ticarət Marşrutu – Orta Dəhlizin inkişafı üçün 201 milyon dollarlıq maliyyə ayıracağını açıqlayıb.
Crossmedia.az xarici mediaya istinadən xəbər verir ki, ABŞ Dövlət Departamenti Transxəzər Sahibkarlıq Fondunun yaradıldığını elan edib.
Bildirilib ki, yeni fond Cənubi Qafqaz və Mərkəzi Asiyada Orta Dəhliz boyunca özəl sektor investisiyalarını stimullaşdırmaq məqsədi daşıyır.
Açıqlama Azərbaycan və Ermənistan arasında Vaşinqton razılaşmalarının birinci ildönümü ilə bağlı yayımlanıb. ABŞ Dövlət Departamenti xatırladıb ki, bir il əvvəl lider Donald Tramp Ağ Evdə Azərbaycan Prezidenti İlham Əliyev və Ermənistanın Baş naziri Nikol Paşinyanı qəbul edib və tərəflərin tarixi Birgə Bəyannamə imzalamasına şahid olub.
Departamentin məlumatına görə, həmin sənəd Cənubi Qafqazda uzun illər davam edən münaqişəyə son qoymaq və beynəlxalq sülh və rifah naminə Tramp marşrutu (TRIPP) layihəsinin həyata keçirilməsi üçün yol açıb.
ABŞ bildirib ki, TRIPP çərçivəsində dəmir yolu, avtomobil yolları, enerji və rəqəmsal infrastrukturun modernləşdirilməsi nəzərdə tutulur.
Məlumata görə, Ermənistanda dəmir yolunun tikintisi üçün mühəndis araşdırmalarına başlanılıb, Azərbaycan isə Ermənistanla əlaqələndirəcək avtomobil və dəmir yolu layihələrini böyük ölçüdə tamamlayıb.
ABŞ Dövlət Departamenti hesab edir ki, sülh prosesi ABŞ, Azərbaycan və Ermənistan arasında əlaqələrin güclənməsi və regionda iqtisadi inkişaf üçün yeni imkanlar yaradıb.
18:48 08.08.2026
Oxunuş sayı: 53
