Azərbaycan sülh vasitələrini birləşdirən strategiya həyata keçirir - Rəy
Azərbaycan və Ermənistan arasında sülh müqaviləsinin paraflanması Cənubi Qafqazın gələcəyi baxımından tarixi əhəmiyyət daşıyan hadisə idi. Vaşinqtonda ABŞ prezidentinin iştirakı ilə baş tutan bu proses, uzun illər davam edən münaqişə və qarşıdurmadan sonra regionda yeni siyasi reallığın formalaşdığını göstərdi. Sənədin paraflanması Azərbaycan və Ermənistan arasında münasibətlərin normallaşması ilə yanaşı, Cənubi Qafqazda davamlı sülhün, regional əməkdaşlığın və iqtisadi inteqrasiyanın əsasını yarada bilər. Bu baxımdan, qarşıdakı mərhələdə əldə olunan razılaşmaların icrası və tərəflərin üzərinə götürdüyü öhdəliklərin yerinə yetirilməsi xüsusi əhəmiyyət daşıyır.
Mövzu ilə bağlı Crossmedia.az-a açıqlama verən Milli Məclisin deputatı Asim Mollazadə qeyd edib ki, Avqustun 8-i 20205-ci il tarixi bir gün idi: “Vaşinqtonda ABŞ prezidenti Donald Trampın iştirakı ilə bu sənədin paraflanması, əlbəttə ki, gələcəkdə Cənubi Qafqazda sabitlik, əməkdaşlıq və inkişaf mühiti yaratmaq üçün çox mühüm bir addımdır. Azərbaycan bu istiqamətdə hər zaman sülh siyasəti yürüdüb. Bizə əslində sülh lazımdır. Çünki bizim qlobal strateji layihələrimizi həyata keçirmək üçün sabitlik və əməkdaşlıq mühiti olmalıdır. Azərbaycan sülh istiqamətində bütün zəruri addımları atıb”.
Deputat əlavə edib ki, bunu Ermənistanın baş naziri də çıxışında etiraf edib: “O, bildirib ki, artıq Azərbaycan və Ermənistan arasında müvafiq layihələr həyata keçirilir. Bu layihələr imkan verir ki, Ermənistanın qapıları açılsın, Ermənistan Azərbaycan vasitəsilə yanacaqla da təmin edilsin. Hazırda vəziyyət elədir ki, Ermənistan üzərinə düşən son öhdəlikləri, yəni öz konstitusiyası çərçivəsində zəruri dəyişiklikləri və ərazi iddialarını konstitusiyasından çıxardıqdan sonra paraflanmış sənəd imzalana bilər və Cənubi Qafqaz sülh, əməkdaşlıq və tərəfdaşlıq məkanına çevrilə bilər. Burada Azərbaycanın strategiyasının gücü ondan ibarətdir ki, Azərbaycan məhz sülh vasitələrini birləşdirən strategiya həyata keçirir. Sülh mühitində daha sürətlə inkişaf edəcək və Azərbaycan xalqının rifahını təmin etmək üçün bu, zəruri bir şans yaradıb”.
Ayhan
12:45 08.08.2026
Oxunuş sayı: 60
