Ceyhun Bayramovun Ukraynaya səfərinin pərdəarxası: İkitərəfli münasibətlərdə yeni mərhələ başlayır
Müstəqil xarici siyasətin ən bariz göstəricisi-geosiyasi fırtınaların ortasında belə, prinsiplərindən və vicdanından güzəştə getməmək bacarığıdır. Azərbaycanın postmüharibə dövründə formalaşdırdığı balanslı və praqmatik diplomatik kurs yalnız güc balanslarını qorumaqla kifayətlənmir, həm də beynəlxalq hüquqa sədaqətin, sarsılmaz humanizmin əyani modelini yaradır. Xarici işlər naziri Ceyhun Bayramovun Ukraynaya gerçəkləşdirilən strateji səfəri - dağıntıların ortasından yüksələn İrpen məktəbindən prezident Volodimir Zelenski ilə aparılan yüksəksəviyyəli müzakirələrə qədər - Rəsmi Bakının beynəlxalq arenadakı prinsipial duruşunun, sözü ilə əməli üst-üstə düşən etibarlı tərəfdaş imicinin növbəti təntənəsidir. Məsələ bağlı Milli Məclisin deputatı Azər Badamov Crossmedia.az-a açıqlama verib.
"Prezident İlham Əliyevin dövlətin milli maraqlarına əsaslanan balanslı, praqmatik və müstəqil siyasi kursu beynəlxalq səviyyədə yüksək qiymətləndirilir. Bu siyasət Azərbaycanın beynəlxalq arenadakı mövqeyini gücləndirməklə yanaşı, dost və tərəfdaş ölkələrin sayının artmasına da mühüm töhfə verir.
Xarici işlər naziri Ceyhun Bayramovun Rusiya–Ukrayna müharibəsi başladıqdan sonra Ukraynaya ilk rəsmi səfərlərdən birini həyata keçirməsi Azərbaycan–Ukrayna münasibətlərinin inkişafı baxımından mühüm əhəmiyyət daşıyır. Xüsusilə səfərin Azərbaycanın humanitar dəstəyi ilə yenidən qurulan məktəb, reabilitasiya mərkəzi və xəstəxananın yerləşdiyi İrpen şəhərindən başlanması xüsusi qeyd olunmalıdır".
O, bildirib ki, Azərbaycan müharibədən əziyyət çəkən Ukrayna xalqına humanitar yardım göstərilməsini davam etdirir: "Prezident Volodimir Zelenski ilə keçirilən görüşdə Ukrayna liderinin Azərbaycanın göstərdiyi humanitar yardımlara və davam edən dəstəyə görə Prezident İlham Əliyevə və Azərbaycan Respublikasına təşəkkür etməsi ölkəmizin həyata keçirdiyi humanitar siyasətin əhəmiyyətini bir daha göstərir.
Ceyhun Bayramovun Ukraynaya səfəri Azərbaycan–Ukrayna münasibətlərinin siyasi, iqtisadi və humanitar istiqamətlərdə daha da inkişaf etdirilməsi baxımından mühüm addımdır. Azərbaycan uzun illər işğaldan əziyyət çəkmiş və beynəlxalq hüquqa hörmət edən ölkə kimi Ukraynanın ərazi bütövlüyü məsələsində prinsipial mövqe nümayiş etdirir".
Parlamentari qeyd edib ki, postmüharibə dövründə Azərbaycanın həyata keçirdiyi bərpa və yenidənqurma layihələri bu sahədə mühüm təcrübə formalaşdırıb: "Ukraynada müharibə başa çatdıqdan sonra Azərbaycan bu istiqamətdə də əməkdaşlığını genişləndirə bilər.
Prezident Volodimir Zelenski ilə keçirilən görüşdə Azərbaycan və Ukrayna arasında ticarət-iqtisadi, humanitar və enerji sahələrində əməkdaşlığın genişləndirilməsi ilə bağlı məsələlər müzakirə olunub.
Bütün bunları nəzərə alaraq qeyd etmək olar ki, Ceyhun Bayramovun Ukraynaya səfəri Azərbaycan–Ukrayna münasibətlərinin inkişafı, eləcə də müharibənin beynəlxalq hüququn norma və prinsipləri əsasında başa çatdırılması istiqamətində Azərbaycanın mövqeyinin ifadəsi baxımından mühüm əhəmiyyət daşıyır".
Turqut Ansari
19:30 07.08.2026
Oxunuş sayı: 60
