Türkiyəli jurnalistlər Qarabağda: İki ölkə arasında strateji tərəfdaşlığın mühüm istiqaməti müəyyənləşir
İşğaldan azad olunmuş ərazilərdə aparılan genişmiqyaslı bərpa və yenidənqurma işləri beynəlxalq ictimaiyyətin də diqqət mərkəzindədir. Bu proseslə yerində tanış olmaq üçün Türkiyədən gələn jurnalistlərin Qarabağa səfəri görülən işlərin beynəlxalq mediada obyektiv şəkildə işıqlandırılması baxımından mühüm əhəmiyyət daşıyır. Səfər eyni zamanda Azərbaycan ilə Türkiyə arasında media əməkdaşlığının daha da möhkəmlənməsinə və postmünaqişə dövrünün reallıqlarının dünya ictimaiyyətinə çatdırılmasına töhfə verir.
Milli Məclisin deputatı Bəhruz Məhərrəmov Crossmedia.az-a açıqlamasında bildirib ki, türkiyəli jurnalistlərin işğaldan azad edilmiş ərazilərə səfəri Azərbaycanın postmünaqişə dövründə həyata keçirdiyi bərpa və yenidənqurma işlərinin beynəlxalq ictimaiyyətə çatdırılması baxımından mühüm əhəmiyyət daşıyır.
Onun sözlərinə görə, bu cür media turları Azərbaycanın informasiya siyasətinin və beynəlxalq hüquqa əsaslanan mövqeyinin gücləndirilməsinə xidmət edir:
"Türkiyəli jurnalistlərin işğaldan azad edilmiş ərazilərə səfəri və aparılan genişmiqyaslı bərpa-quruculuq işləri ilə yerində tanış olması Azərbaycanın öz suveren ərazisində həyata keçirdiyi yenidənqurma siyasətinin legitimliyini və şəffaflığını beynəlxalq ictimaiyyətə nümayiş etdirmək baxımından mühüm strateji və hüquqi əhəmiyyət daşıyır".
Həmsöhbətimiz hesab edir ki, belə səfərlər postmünaqişə reallıqlarının beynəlxalq informasiya məkanında düzgün təqdim olunmasına da mühüm töhfə verir:
"Bu qəbildən olan media turları informasiya suverenliyinin təmin olunması, postmünaqişə reallıqlarının beynəlxalq müstəvidə daha obyektiv təqdim edilməsi və dezinformasiya risklərinin qarşısının alınması baxımından mühüm vasitədir".
Deputat vurğulayıb ki, media əməkdaşlığı Azərbaycan və Türkiyə arasında strateji tərəfdaşlığın mühüm istiqamətlərindən biridir:
"Şuşa Bəyannaməsində əksini tapan strateji müttəfiqlik ruhuna uyğun olaraq, Türkiyə mediasının regionda həyata keçirilən humanitar, ekoloji və infrastruktur layihələrini, eləcə də mina təhlükəsi ilə bağlı vəziyyəti yerində müşahidə etməsi faktların beynəlxalq auditoriyaya obyektiv və etibarlı şəkildə çatdırılmasına xidmət edir. Bu, eyni zamanda Azərbaycanın informasiya diplomatiyasının effektivliyini artırır və regionda davamlı sülhün, təhlükəsizliyin və beynəlxalq hüquqa əsaslanan əməkdaşlığın möhkəmlənməsinə töhfə verir".
Nigar Xəlilli
10:00 07.08.2026
Oxunuş sayı: 63
