KİV: Trampın hədələri və ultimatumları əvvəlki təsirini itirir
ABŞ Prezidenti Donald Trumpnin sərt bəyanatları və ultimatumları artıq nə müttəfiqlər, nə də rəqiblər tərəfindən əvvəlki kimi ciddi qəbul edilmir.
Crossmedia.az xəbər verir ki, "The Washington Post" bu barədə təhlil yayıb.
Nəşrin yazdığına görə, Trampın ikinci prezidentlik dövrünün əvvəlində səsləndirdiyi bəyanatlar dünya bazarlarında ciddi dalğalanma yaratsa da, son 16 ayda beynəlxalq ictimaiyyət bu cür açıqlamalara daha sakit reaksiya verməyə başlayıb.
Məqalədə qeyd olunur ki, Tramp bu müddətdə yeni gömrük rüsumları tətbiq etməklə, ABŞ-ın NATO-dan çıxması, Kanada və Qrenlandiyanın ilhaqı, eləcə də İrana qarşı sərt addımlar atmaqla bağlı dəfələrlə hədələr səsləndirib. Lakin bir çox ölkə artıq bu bəyanatları qaçılmaz qərarlar kimi qiymətləndirmir.
Bildirilir ki, son tarif qərarları elan edilərkən dünya maliyyə bazarları demək olar ki, reaksiya verməyib. Fransa Mərkəzi Bankının rəhbəri iqtisadi təsiri cüzi adlandırıb, Böyük Britaniya ixracatçılarının ciddi zərər görməyəcəyini açıqlayıb, Meksikanın iqtisadiyyat naziri isə vəziyyəti "bir tarifin digəri ilə əvəz olunması" kimi qiymətləndirib.
Avropa Parlamentinin ABŞ ilə əlaqələr üzrə nümayəndə heyətinin rəhbəri Brando Benifey bildirib ki, Trampın gündəlik açıqlamalarına artıq öyrəşiblər və onları əvvəlki qədər ciddi qəbul etmirlər.
Təhlildə həmçinin vurğulanır ki, Çin, Avropa ölkələri və İran son dövrlərdə Vaşinqtonun təzyiqlərinə daha sərt müqavimət göstərməyə başlayıb. Xüsusilə qeyd olunur ki, İrana qarşı ultimatumlar da istənilən nəticəni verməyib və sonradan Tramp ilkin məqsədlərini dəyişmək məcburiyyətində qalıb.
ABŞ-ın keçmiş səfiri Ronald Noymanın fikrincə, belə taktika əksinə, Vaşinqtonun zəif görünməsinə səbəb olur.
11:06 05.08.2026
Oxunuş sayı: 57
