Tramp: Hörmüz boğazı açılmasa, İrana yeni zərbə endirilə bilər
ABŞ Prezidenti Donald Trump İranla müvəqqəti razılaşmanın mümkünlüyü fonunda bəyan edib ki, Hörmüz boğazı yaxın vaxtlarda açılmasa, Vaşinqton Tehrana qarşı yeni hərbi zərbə endirə bilər.
Crossmedia.az xəbər verir ki, "Axios" bu barədə məlumat yayıb.
Məlumata görə, ABŞ administrasiyası çərşənbə günü İran və Omanla Hörmüz boğazında gəmiçiliyin bərpasına dair razılığın əldə olunduğunu elan etməyə hazırlaşır.
Bildirilir ki, söhbət 60 günlük müvəqqəti razılaşmadan gedir. Sənədə əsasən, Fars körfəzinə daxil olan gəmilər İranın ərazi sularından heç bir ödəniş olmadan keçəcək, əks istiqamətdə hərəkət edən gəmilər isə Omanın ərazi sularından istifadə edəcək və bütün proses Tehranla koordinasiya olunacaq.
Tramp eyni zamanda vurğulayıb ki, İranın nüvə silahına malik olmaması rəsmi şəkildə təsbit ediləcək.
"İranın heç vaxt nüvə silahı olmayacaq. Onlar artıq buna sahib ola bilməzlər, lakin bu, rəsmi şəkildə də təsbit olunacaq", – ABŞ Prezidenti bildirib.
10:24 05.08.2026
Oxunuş sayı: 46
