KİV: Ukrayna Rusiya zərbələri səbəbindən milyardlarla dollar itirə bilər
Ukrayna Rusiya ordusunun limanlara endirdiyi zərbələr səbəbindən bu il 1,5-3 milyard dollar itki ilə üzləşə bilər.
Crossmedia.az xəbər verir ki, bu barədə ˝Reuters˝ məlumat yayıb.
Ukraynanın aqrar siyasət naziri Taras Visotskinin sözlərinə görə, ölkə taxıl ixracı üçün alternativ marşrutlar hazırlayır. Lakin bu marşrutlar lazımi gücə ən tez avqustun sonunda çata və Odessa limanlarından əvvəl daşınan yüklərin yalnız təxminən yarısını əvəz edə bilər.
Bu isə Ukraynanın ixrac etdiyi məhsulun təxminən yarısının xarab olmaq riski ilə üzləşməsi deməkdir. Reuters-in məlumatına görə, Rusiya hücumları fonunda gəmi sahibləri Odessa ətrafındakı limanlara girişləri demək olar ki, dayandırıblar.
Məlumata görə, iyul ayında limanlarda gəmilərə 35, dənizdə isə 22 hücum qeydə alınıb. Həmçinin liman infrastrukturuna 67 zərbə endirilib. Müqayisə üçün, 2025-ci ilin bütün ili ərzində gəmilərə cəmi 14 hücum olub.
“Bu problem həll edilməsə, 30 milyon tondan çox məhsul beynəlxalq bazarlara ixrac edilməyəcək”, – Visotski bildirib.
Hazırda Ukrayna dəmir yolu, avtomobil yolları və Dunay çayı vasitəsilə daşımaları artırmağa çalışır. Lakin bu alternativ marşrutlar istehsalçıların xərclərini hər ton üçün təxminən 45-50 dollar artıracaq.
20:08 04.08.2026
Oxunuş sayı: 53
