Torpaq sürüşmələrinin qarşısını almaq üçün heç bir tədbir görülmür
Bakının Xətai rayonunun Əhmədli qəsəbəsində baş verən torpaq sürüşməsi ərazidə təhlükəsizlik məsələsini yenidən gündəmə gətirib. Mütəxəssislər bildirirlər ki, torpaq sürüşmələri təkcə təbii proseslərin nəticəsi deyil, həm də insan amilinin yaratdığı problemlərlə birbaşa əlaqəlidir. Xüsusilə sürətlə aparılan tikinti işləri, yaşıllıq sahələrinin azalması və su təsərrüfatındakı nöqsanlar bu riskləri artıran əsas amillər sırasındadır. Son illər Bakının müxtəlif ərazilərində, o cümlədən Bayıl yamacında da oxşar hadisələrin baş verməsi mütəxəssislərin narahatlığını artırır. Ekspertlər hesab edirlər ki, torpaq sürüşmələrinin qarşısını almaq üçün təkcə nəticələrlə deyil, səbəblərlə mübarizə aparmaq lazımdır. Əks halda belə hadisələrin təkrarlanması qaçılmaz olacaq. Onların fikrincə, yaşıllıqların qorunması, düzgün şəhərsalma siyasəti və kommunal xətlərə nəzarətin gücləndirilməsi bu istiqamətdə əsas tədbirlərdəndir.
Mövzu ilə bağlı Crossmedia.az-a açıqlama verən ekoloq Qorxmaz İbrahimli bildirib ki, Bakı şəhərində Bayıl yamacında sürüşmə sahələri var. "Bir çox ərazilərdə də, o cümlədən Əhmədlidə torpaq sürüşmələri zaman-zaman baş verir. Bu proseslərin əsas səbəblərindən biri yaşıllıq və ağac örtüyünün kifayət qədər olmamasıdır. İkinci mühüm səbəb torpağın üzərinə normadan artıq yükün verilməsidir. Tikinti işləri və torpağın ağırlıq altında qalması sürüşmə riskini artırır. Bundan başqa, kanalizasiya sularının düzgün istiqamətləndirilməməsi, eləcə də içməli su xətlərindən məsuliyyətsiz şəkildə axıntılara yol verilməsi torpağın yumşalmasına və sürüşməyə səbəb olur. Bildiyim qədərilə, Əhmədlidə baş verən son hadisə də əvvəllər sürüşmə müşahidə olunan ərazidə təkrarlanıb. Bu, normal hal olmasa da, müəyyən mənada gözlənilən idi. Çünki torpaq sürüşmələrinin qarşısını almaq üçün lazımi tədbirlər görülmür. Meşə zolaqları salınmır, əksinə, mövcud parklar və yaşıllıq sahələri məhv edilir. Halbuki torpağı bərkidən əsas amillərdən biri ağacların kök sistemidir. Ağacların kökləri torpağı möhkəmləndirir və sürüşmə riskini azaldır. Bu amil aradan qalxdıqda isə belə hadisələrin baş verməsi qaçılmaz olur".
Zeynəb Həsən
17:30 04.08.2026
Oxunuş sayı: 50
