KİV: Ukraynanı müharibənin ən çətin qışı gözləyir
Ukrayna Rusiyanın genişmiqyaslı işğalından sonra ən ağır qış sınağı ilə üzləşə bilər. ABŞ-nin keçmiş NATO-dakı səfiri Kurt Volker hesab edir ki, Rusiya Prezidenti Vladimir Putin qışdan Ukraynanı zəiflətmək üçün istifadə etməyə çalışacaq.
Crossmedia.az xəbər verir ki, “CNBC” bu barədə məlumat yayıb.
Məlumata görə, son həftələrdə Rusiya ordusu Ukrayna şəhərlərinə raket zərbələrinin sayını artırıb. Bu hücumların Kiyevin ballistik raketlərin qarşısını almaq üçün imkanlarının məhdud olmasından istifadə məqsədi daşıdığı ehtimal edilir.
“Fire Point” şirkətinin baş direktoru İrina Terex bildirib ki, Ukrayna qarşıdakı aylarda üzləşəcəyi təhlükəni real qiymətləndirməlidir. Onun sözlərinə görə, ölkədə hava hücumundan müdafiə sistemlərinin çatışmazlığı ciddi problem olaraq qalır.
Terex qeyd edib ki, qarşıdan gələn qış əvvəlkindən də çətin ola bilər. O bildirib ki, Ukrayna hələ də Rusiya ballistik raketlərinin qarşısını almaq üçün ABŞ istehsalı olan “Patriot PAC-3” raketlərindən böyük ölçüdə asılıdır.
“Biz adətən 20-30 il tələb edən bir proqramı bir neçə ilə həyata keçirməyə çalışırıq. Bunu qışa üç ay qalmış etmək mümkün deyil”, – deyə o vurğulayıb.
Ukrayna qışa hazırlıq çərçivəsində enerji infrastrukturunun müdafiəsini gücləndirir, istilik və elektrik təminatı üçün ehtiyatlar yaradır. Həmçinin Avropa tərəfdaşlarından əlavə maliyyə dəstəyi almağa və qış dövrü üçün yardım paketi formalaşdırmağa çalışır.
Analitik Sergey Kuzan hesab edir ki, Ukrayna hökumətindəki son kadr dəyişiklikləri də sərt qışa hazırlıqla bağlı ola bilər. Onun sözlərinə görə, yenilənmiş hökumətin əsas vəzifələrindən biri enerji və müdafiə infrastrukturunun soyuq hava şəraitinə tam hazır vəziyyətə gətirilməsidir.
ABŞ-nin keçmiş NATO-dakı səfiri Kurt Volker isə bildirib ki, Putin qış aylarından Ukraynanın enerji və istilik sistemlərinə zərbə vurmaqla ölkəni sındırmaq cəhdi üçün istifadə edə bilər.
Bununla belə, Volker qeyd edib ki, Kiyev Rusiya ballistik raket hücumlarına qarşı əvvəlki qışla müqayisədə daha hazırlıqlı vəziyyətdədir.
“Putin uzunmüddətli məğlubiyyət yolundadır. O, döyüş meydanındakı itkilərin öhdəsindən gələ bilmir. Ukrayna Rusiyanın neft emalı və ixrac imkanlarına zərbələr endirərək Kremlin büdcəsinə təzyiq göstərir”, – deyə Volker bildirib.
Onun fikrincə, Rusiya lideri qışda da mübarizəni davam etdirəcək, lakin yaz aylarına doğru müharibəni davam etdirmək imkanları daha da məhdudlaşacaq və atəşkəsə razı olmaq məcburiyyətində qala bilər.
Analitiklər Ukraynanın Rusiyanın əsas logistika mərkəzlərinə yönəlmiş son hücumlarını müharibənin iqtisadi xərclərini artırmaq strategiyası kimi qiymətləndirirlər. Onların fikrincə, məqsəd Moskvanı danışıqlar masasına qayıtmağa məcbur etməkdir.
13:53 04.08.2026
Oxunuş sayı: 62
