Uels FIFA prezidentliyində İnfantinoya dəstəyi geri götürdü
Uels Futbol Assosiasiyası FIFA prezidenti Canni İnfantinonun 2027–2031-ci illər üçün yenidən seçilməsinə verdiyi dəstəyi rəsmi şəkildə geri götürüb. Bununla da Uels İnfantinonun namizədliyini dəstəkləməkdən imtina edən ilk futbol assosiasiyası olub.
Crossmedia.az xəbər verir ki, "Sky News" bu barədə məlumat yayıb.
Uels Futbol Assosiasiyasının bəyanatında bildirilib ki, Dünya Kuboku ilə bağlı payların satışı planının uğursuzluğu və son dövrdə idarəetmə sahəsində baş verən problemlər Canni İnfantinonun rəhbərliyinə olan etimadı sarsıdıb.
Qurum qeyd edib ki, idarəetmə, qərar qəbuletmə, liderlik, dəyərlər, maraqlı tərəflərlə münasibətlər və kommunikasiya sahələrindəki çatışmazlıqlar səbəbindən İnfantinonun dünya futboluna rəhbərlik etməyə davam etməsinə artıq etimad göstərmir.
"Futbolun maraqlarını hər şeydən üstün tutmamaq bizim qəbul edə bilməyəcəyimiz uğursuzluqdur", – deyə bəyanatda vurğulanıb.
Məlumata görə, Uels Futbol Assosiasiyası mövqeyi ilə bağlı FIFA-ya rəsmi məktub göndərib.
"Sky News"un məlumatına əsasən, bu addım Avropa futbol qurumlarının İnfantinoya qarşı artan narazılığının bir hissəsidir. Bildirilir ki, yaxın vaxtlarda digər milli assosiasiyaların da Uelsin mövqeyinə qoşulacağı gözlənilir. Məqsəd etimadsızlıq səsverməsinə ehtiyac qalmadan İnfantinoya təzyiqi artırmaqdır.
Xəbərdə qeyd olunur ki, İnfantino gələn il yenidən FIFA prezidentliyinə namizəd olmağı planlaşdırırdı. Lakin son hadisələrdən sonra onun rəhbərliyinin ciddi təzyiqlə üzləşdiyi bildirilir.
UEFA isə Dünya Kuboku ilə bağlı planı "naməlum şəxslər tərəfindən hazırlanmış, şəffaf olmayan təşəbbüs" kimi qiymətləndirərək, belə halların gələcəkdə təkrarlanmaması üçün yeni mexanizmlər üzərində işlədiyini açıqlayıb.
Qeyd edək ki, Uels Beynəlxalq Futbol Assosiasiyaları Şurasında (IFAB) səkkiz səs hüququndan birinə malikdir. Bu qurum futbolun oyun qaydalarını müəyyənləşdirən əsas beynəlxalq orqandır.
11:42 03.08.2026
Oxunuş sayı: 65
