Araşdırma: Qadınlar ev heyvanlarına kişilərdən daha çox bağlanır
Simpsonlardan Ofis serialına qədər dəli pişiksevər qadın obrazı illərdir kino və televiziyada klassik stereotip kimi təqdim olunur.
Crossmedia.az bu barədə xarici mediaya istinadən xəbər verir.
Lakin İsveçrəli alimlərin yeni araşdırması qadınların həqiqətən də ev heyvanlarına kişilərdən daha güclü emosional bağlılıq hiss etdiyini göstərib.
Lüsern Universitetinin alimləri 2 mindən çox yetkin respondent arasında sorğu keçirərək insanların ev heyvanları ilə emosional münasibətlərini araşdırıblar.
Nəticələrə görə, qadınlar ev heyvanlarına daha dərin emosional bağlılıq göstərir və onları sosial-emosional dəstəyin əsas mənbəyi kimi kişilərdən daha çox qəbul edirlər.
Ev heyvanına sahib olmaq bağlılıq demək deyil
Tədqiqatçılar bildiriblər ki, insanların heyvanlarla münasibəti sadəcə ev heyvanının olub-olmaması ilə ölçülə bilməz.
“İki insanın hər ikisinin iti ola bilər, lakin onların heyvanla emosional əlaqəsi tamamilə fərqli ola bilər. Bu nüansları anlamaq heyvan sahibləri ilə ev heyvanı olmayan insanlar arasında sadə müqayisədən daha çox məlumat verir”, – alimlər qeyd ediblər.
2 328 iştirakçının qatıldığı sorğu nəticəsində bir neçə əsas məqam müəyyənləşdirilib:
Kimlər daha güclü bağlanır? Qadınlar, ev heyvanları ilə daha çox vaxt keçirən insanlar və it sahibləri heyvanlarına ən güclü emosional bağlılıq göstərən qruplar olub.
Sağlamlıqla bağlı gözlənti təsdiqlənməyib: Tədqiqatçılar ev heyvanına sahib olmağın sahibinin fiziki sağlamlığını yaxşılaşdırdığına dair sübut tapa bilməyiblər.
Ev heyvanlarına bağlılığın digəri
Araşdırmanın nəticələri gözlənilməz məqam da ortaya çıxarıb. Ev heyvanı olan insanlar orta hesabla sağlamlıq problemlərindən daha çox şikayət edib və heyvanı olmayan şəxslərlə müqayisədə daha çox siqaret çəkdiklərini bildiriblər.
Bundan əlavə, heyvanlardan maksimum emosional dəstək gözləyən insanların praktikada daha çox tənhalıq hiss etdiyi və psixoloji rifah səviyyələrinin daha aşağı olduğu müəyyənləşdirilib.
Pişiklər insanların emosiyalarını ayırd edə bilmir?
Bu nəticə başqa bir araşdırmanın nəticələri ilə də səsləşir. Həmin araşdırmaya əsasən, pişiklər insan səsindəki emosional çalarları fərqləndirmək qabiliyyətinə malik deyil.
Buna görə onların nəzərində insanın gülüşü, ağlaması və qışqırması eyni səslənə bilər.
Bari Universitetinin doktoru Serenella dİnceonun sözlərinə görə, pişiklər sevinc, qorxu və ya kədəri ayırd etmək əvəzinə sadəcə daha yüksək ayıqlıq vəziyyətinə keçirlər.
Alimin fikrincə, bu, mümkün təhlükəyə sürətlə reaksiya verməyə imkan verən adaptiv strategiyadır.
07:30 31.07.2026
Oxunuş sayı: 43
