Saniyələr içində ölümə aparan səhv: Ekspertdən çimərliklərdə gizli təhlükə xəbərdarlığı
Yay mövsümündə çay, göl və digər açıq su hövzələrində boğulma nəticəsində ölüm halları artır. Bu hadisələr su hövzələrində təhlükəsizlik qaydalarına əməl olunmasının vacibliyini bir daha gündəmə gətirir. Mütəxəssislər bildirirlər ki, bu cür hadisələrin əksəriyyəti vaxtında görülən sadə təhlükəsizlik tədbirləri ilə qarşısı alına biləcək hallardır.
Mövzu ilə bağlı təhlükəsizlik məsələləri üzrə ekspert Orxan Musayev Crossmedia.az-a bildirib ki, çimərliklərdə baş verən faciələrin böyük əksəriyyəti insan amili səbəbindən baş verir:
"Yəni insanların qarşısı alına biləcək səhvləri nəticəsində onlar təhlükəli vəziyyətlərlə üz-üzə qalırlar. Dəniz istirahəti insanların maraq göstərdiyi istirahət növlərindən və məkanlarından biri hesab olunur. Lakin bu gözəllik çox qısa zamanda və qəfil şəkildə insan həyatı üçün təhlükəyə çevrilə bilər. Bəzən insanlar dənizdə istirahət zamanı su hövzələrinin təhlükəli tərəflərinin olduğunu unudurlar".
Ekspert qeyd edib ki, spirtli içki qəbul etdikdən sonra suya girmək, uşaqları nəzarətsiz buraxmaq, qadağan olunmuş ərazilərdə çimmək hələ də geniş yayılan davranışlar sırasındadır:
"Çünki belə məkanlarda Fövqəladə Hallar Nazirliyinin xüsusi xilasedici heyəti fəaliyyət göstərir və hər hansı fövqəladə hadisə baş verdikdə çevik müdaxilə imkanları mövcuddur".
O.Musayevin sözlərinə görə, nəzarətsiz çimərliklərdə xilasedici xidmətin olmaması baş verən hadisələr zamanı insan həyatının xilas edilməsini çətinləşdirir:
"Nəzarət olunan çimərliklərdə isə suyun dərinlik səviyyəsi müəyyən edilir, insanların ayaq altında xəsarət almasına səbəb ola biləcək daşlar, daş qırıntıları və qayalar təmizlənir. Dənizə girməzdən əvvəl hava şəraiti, küləyin gücü və dalğaların hündürlüyü mütləq nəzərə alınmalıdır. Hətta peşəkar üzgüçülər belə meteoroloji amillərin təsiri nəticəsində çətin vəziyyətlə üzləşə bilərlər".
Onun fikrincə, maarifləndirici və təbliğat xarakterli işlər daha da gücləndirilməlidir:
"İnsanlar yalnız “dalğa var”, “üzmək olmaz” kimi xəbərdarlıqları deyil, eyni zamanda dalğaların insan orqanizminə təsirini, axına düşdükdə hansı proseslərin baş verdiyini və boğulma zamanı orqanizmdə gedən dəyişiklikləri də bilməlidirlər".
Müsahibimiz qeyd edib ki, çimərliklərdə təhlükəsizlik qaydalarının pozulmasına qarşı həm ictimai qınaq, həm də inzibati tədbirlər tətbiq olunmalıdır:
"Qadağan olunmuş ərazilərdən istifadə və ya spirtli içki qəbul etdikdən sonra suya girmək kimi hallara görə cərimə mexanizmləri insanların bu cür davranışlardan çəkinməsinə səbəb ola bilər. Boğulma hadisələrinin böyük hissəsi saniyələr ərzində, səssiz və heç bir xəbərdarlıq olmadan baş verir. Belə hallarda insanlar çox vaxt qışqıra bilmir, sadəcə suyun altında qala bilirlər. Hər il təkrarlanan faciələrin əsas səbəblərindən biri ehtiyatsızlıq və “heç nə olmaz” düşüncəsidir. Bu yanaşmadan uzaqlaşmaq və təhlükəsizlik qaydalarına ciddi əməl etmək vacibdir".
Zərnigar Hüseynli
14:30 30.07.2026
Oxunuş sayı: 50
