Valideynlər məktəbəqədər təhsil layihələrində tərəfdaş qismində iştirak edəcəklər
Azərbaycan Respublikası Nazirlər Kabinetinin 17 iyul 2026-cı il tarixli 218 nömrəli qərarına əsasən, məktəbəqədər təhsil sahəsində valideyn-dövlət-özəl əməkdaşlığına əsaslanan maliyyələşmə modeli çərçivəsində valideynlər layihələrdə tərəfdaş qismində iştirak edəcəklər.
Crossmedia.az xəbər verir ki, Qərara əsasən, müsabiqə qalibləri barədə məlumatlar Elm və Təhsil Nazirliyinin rəsmi internet saytında yerləşdirildikdən sonra valideynlər təqdim olunan şərtlərlə, o cümlədən aylıq iştirak payı ilə tanış ola biləcəklər.
Valideynlər dövlət dəstəyindən yararlanmaq üçün “Elektron Hökumət İnformasiya Sistemi”ndə (EHİS) yaradılmış elektron kabinet vasitəsilə övladlarının qeydiyyatını aparacaq, elektron ərizəni dolduraraq təsdiq edəcəklər. Elektron kabinet vasitəsilə valideynlər istənilən vaxt elektron ərizələrinin cari statusu barədə məlumat əldə edə biləcəklər.
Elektron ərizəyə “Məktəbəqədər təhsil haqqında” Qanunun 8.9-cu maddəsində nəzərdə tutulan şəxslər kateqoriyasına aid olmağı təsdiq edən sənədin və təhsilalanın şəxsiyyətini təsdiq edən sənədin surətləri əlavə edilməlidir.
Sənədə əsasən, elektron ərizədə natamamlıq və ya uyğunsuzluq aşkar edildiyi halda, valideynlərə sənədləri tamamlamaq üçün 3 iş günü müddət veriləcək. Sənədlərin tamlığı təmin edilmədiyi halda ərizənin baxılmamış saxlanılması barədə qərar qəbul ediləcək və bu barədə elektron kabinet vasitəsilə məlumat təqdim olunacaq.
Qeydiyyat zamanı qanunvericilikdə nəzərdə tutulmuş kateqoriyalara aid şəxslərə üstünlük veriləcək, digər müraciətlər isə növbəlilik prinsipi əsasında təsdiqlənəcək. Qeydiyyatı təsdiqlənən valideynlər avtomatik olaraq layihənin iştirakçısı və tərəfdaşı hesab olunacaqlar.
Bundan əlavə, layihələrin maliyyələşdirilməsi maliyyələşdirmə və xidmət müqavilələri əsasında həyata keçiriləcək. Müqavilələrin forması Elm və Təhsil Nazirliyi tərəfindən müəyyən ediləcək və onlar valideynlərin layihədə iştirak müddəti başa çatdıqdan sonra 20 iş günü ərzində bağlanılacaq.
Qərarda, həmçinin qeyd olunur ki, təhsilalanların sayı layihədə nəzərdə tutulandan az olduqda və ya müsabiqə qalibi maliyyələşdirmə müqaviləsini imzalamaqdan imtina etdikdə, bal sıralamasına əsasən növbəti iddiaçı qalib elan ediləcək və ona təhsilalanların cəlb edilməsi üçün 30 təqvim günü müddətində vaxt veriləcək.
Maliyyələşdirmə müqavilələrinin həcmi isə xidmət göstərilən təhsilalanların və onların təhsil aldıqları ayların sayından asılı olaraq müəyyənləşdiriləcək.
18:50 17.07.2026
Oxunuş sayı: 56
