Soydaşımızın təşəbbüsü ilə Qara Qarayevin əsəri İsveçdə tədris olunacaq
Azərbaycanın dünyaşöhrətli bəstəkarı Qara Qarayevin “Yeddi gözəl” baletindən “Adajio” əsərinin fortepiano və skripka üçün işlənmiş variantı İsveçin Katrineholm musiqi məktəbinin tədris proqramına daxil edilib.
Bu, İsveçdə yaşayan soydaşımız, pianoçu Aynur Məlikovanın təşəbbüsü ilə mümkün olub. Məqsəd Azərbaycan mədəniyyətini beynəlxalq səviyyədə tanıtmaq, dahi bəstəkar Qara Qarayevin yaradıcılığını İsveçdə gənc musiqiçilərə çatdırmaq və musiqi vasitəsilə iki ölkə arasında mədəni körpü yaratmaqdır.
O bildirib ki, Azərbaycan klassik musiqisinin zənginliyini İsveçdə tanıtmaq və milli musiqi irsimizi yeni auditoriyaya təqdim etmək məqsədilə Katrineholm musiqi məktəbinin nümayəndələrinə əsərin notlarını və rəqəmsal formatını göndərib. Pianoçunun sözlərinə görə, Katrineholm musiqi məktəbinin rektoru Hanna Moen və skripka müəllimi Sara Karlsson əsəri dinlədikdən sonra onun musiqisinin gözəlliyini, emosional dərinliyini və təsir gücünü xüsusi vurğulayıblar.
Məlumat üçün bildirək ki, bu, Azərbaycan bəstəkarlarının İsveçdə musiqi tədrisinə daxil edilən ikinci əsəridir. Daha əvvəl bəstəkar Arif Məlikovun “Komdenin arzuları” əsəri İsveçin Lidinqö musiqi məktəbinin repertuarında yer alıb.
14:59 16.10.2026
Oxunuş sayı: 53
