Yayın sonuna qədər havanı dəqiq proqnozlaşdırmaq mümkün deyil
Son günlər ölkə ərazisində müşahidə olunan yüksək temperatur ictimaiyyət arasında müzakirələrə səbəb olub. Xüsusilə bəzi bölgələrdə havanın 40 dərəcəyə yaxınlaşması fonunda bu istilərin iqlim norması olub-olmaması və yay aylarında temperaturun daha da artıb-artmayacağı maraq doğurur. Mütəxəssislər bildirirlər ki, qlobal iqlim dəyişikliyi hava şəraitinə təsir göstərsə də, yay aylarında yüksək temperatur Azərbaycan üçün xarakterik hesab olunur.
Mövzu ilə bağlı Crossmedia.az-a danışan ekoloq Sadiq Həsənov bildirib ki, hazırda müşahidə olunan 40 dərəcə isti yay mövsümü üçün normal hesab olunur: "Azərbaycanda maksimal temperatur adətən 40-41 dərəcə təşkil edir, bəzi hallarda isə Naxçıvan və Aran bölgəsində 45 dərəcəyə çata bilir. Son illər iqlim dəyişikliyi nəticəsində fəsillərin xarakterində müəyyən dəyişikliklər baş verib. Belə ki, əvvəlki illərlə müqayisədə iyun ayında daha isti hava müşahidə olunur, iyul və avqust aylarında isə temperaturun paylanması fərqli olur. Yay aylarında istilərin olması təbiət üçün də vacibdir, çünki buxarlanma prosesini artırır və sonradan yağıntıların formalaşmasına təsir göstərir".
Ekoloq qeyd edib ki, yer kürəsində orta temperaturun təxminən 1,5 dərəcə artması anomal istilər, yağıntılar və soyuqların daha tez-tez baş verməsinə səbəb olur: "Bu proseslərin əsas səbəbi karbohidrogen yanacaqlarından istifadənin artması və atmosferə daha çox istixana qazlarının buraxılmasıdır. Hazırkı şəraitdə yay mövsümünün sonuna qədər havanın necə keçəcəyini dəqiq proqnozlaşdırmaq mümkün deyil. Çünki iqlim dəyişiklikləri səbəbindən həm beynəlxalq, həm də yerli hava proqnozları əvvəlki dəqiqliklə özünü doğrultmur. Buna görə də yaxın aylarda hava şəraitinin necə dəyişəcəyini qəti şəkildə demək mümkün deyil".
Zeynəb Həsən
15:30 16.07.2026
Oxunuş sayı: 58
