“14 İyul – Müstəqil və Qüdrətli Azərbaycan Dövlətinin təməlinin qoyulduğu gün” mövzusunda tədbir keçirilib
Yasamal rayonunda “14 İyul – Müstəqil və Qüdrətli Azərbaycan Dövlətinin təməlinin qoyulduğu gün” mövzusunda tədbir keçirilib.
Crossmedia.az xəbər verir ki, “Şəhərsalma və Memarlıq İli” çərçivəsində “14 İyul – Ulu Öndər Heydər Əliyevin Azərbaycanda birinci dəfə siyasi hakimiyyətə gəldiyi gün”ə həsr olunmuş Yeni Azərbaycan Partiyası Yasamal rayon təşkilatı və Yasamal Rayon İcra Hakimiyyətinin birgə təşkilatçılığı ilə “14 İyul – Müstəqil və Qüdrətli Azərbaycan Dövlətinin təməlinin qoyulduğu gün” mövzusunda tədbir keçirilib.
Tədbirdə YAP Yasamal rayon təşkilatının sədri Bəxtiyar Nəbiyev, Yasamal Rayon İcra Hakimiyyətinin başçısı Elşad Həsənov , YAP Veteranlar Şurasının üzvü Əli Həsənov, YAP Veteranlar Şurasının üzvü, məşhur “91-lər”dən Şahlar Əsgərov, YAP Veteranlar Şurasının üzvü Misir Mərdanov, Kənd Təsərrüfatı Nazirinin müavini Zaur Əliyev, Azərbaycan Dövlət Su Ehtiyatları Agentliyinin sədr müavini İlham Bayramov, Bakı Dövlət Universitetinin rektoru Elçin Babayev, Azərbaycan Milli Konservatoriyasının rektoru Kamilə Dadaş-zadə, Azərbaycan Dövlət Mədəniyyət və İncəsənət Universitetinin rektoru Ceyran Mahmudova, Həkimləri Təkmilləşdirmə İnstitutunun rektoru Nazim Pənahov, M.Ə.Mirqasımov adına Respublika Klinik Xəstəxanasının direktoru Elviz Qasımov, Milli Məclisin VI çağırış deputatı Elnur Allahverdiyev, Yasamal bələdiyyəsinin sədri Tahir Məmmədov, YAP Yasamal rayon təşkilatının, Yasamal Rayon İcra Hakimiyyətinin əməkdaşları, rayon ictimaiyyəti, ərazi partiya təşkilatının sədr, sədr müavinləri, fəal gənclər və könüllülər iştirak edib.
Tədbir iştirakçıları tərəfindən ilk öncə YAP Yasamal rayon təşkilatının inzibati binasında Ümummilli Lider Heydər Əliyevin büstünün önünə tər gül dəstələri düzülüb, xatirəsi dərin ehtiramla yad edilib.
YAP Yasamal rayon təşkilatında baş tutan tədbirdə ilk öncə Ulu Öndər Heydər Əliyevin, ölkəmizin ərazi bütövlüyü və suverenliyi uğrunda canlarından keçmiş şəhidlərin xatirəsi bir dəqiqəlik sükutla anılıb. Sonra Azərbaycan Respublikasının Dövlət Himni səsləndirilib.
Sonra Ümummilli Lider Heydər Əliyevin 1969-cu il iyulun 14-də Azərbaycanda hakimiyyətə gəlişindən sonra ölkədə gerçəkləşən böyük intibah dövrünü, iqtisadi və mədəni sıçrayışı əks etdirən geniş sənədli videoçarx nümayiş olunub.
Açılış nitqi ilə çıxış edən YAP Yasamal rayon təşkilatının sədri Bəxtiyar Nəbiyev tədbiri açıq elan edərək, 1969-cu il iyulun 14-nün Azərbaycan xalqının taleyində və dövlətçilik tarixində sadəcə bir rəhbər dəyişikliyi deyil, çoxəsrlik tariximizin ən fundamental dönüş nöqtəsi olduğunu diqqətə çatdırıb.
O bildirib ki, 1969-cu ilə qədər olan dövrə nəzər salsaq, Azərbaycan keçmiş SSRİ-nin ən geridə qalmış, yalnız xammal bazası kimi baxılan aqrar respublikalarından biri idi. Məhz ulu öndər Heydər Əliyevin Azərbaycan Kommunist Partiyası Mərkəzi Komitəsinin birinci katibi seçilməsi ilə ölkəmizin taleyi kökündən dəyişdi. Dahi rəhbər qısa müddətdə respublikada güclü nizam-intizam yaratdı, iqtisadiyyatın bütün qollarında nəhəng islahatların əsasını qoydu. Həmin illərdə reallaşdırılan irimiqyaslı layihələr, nəhəng zavod və fabriklərin açılması, infrastrukturun yenidən qurulması və ən əsası, milli kadrların yetişdirilməsi siyasəti birbaşa gələcəkdə qurulacaq müstəqil Azərbaycan dövlətinin iqtisadi, hərbi və intellektual bazasını formalaşdırırdı. Ümummilli Lider sovet imperiyasının sərt qanunlarına rəğmən xalqımızın milli özünüdərkini yenidən oyatdı, ana dilimizi dövlət səviyyəsinə qaldırdı. Bu gün tam qətiyyətlə deyə bilərik ki, müstəqil və qüdrətli müasir Azərbaycanın sarsılmaz təməlləri məhz 14 iyul 1969-cu ildə qoyulmuşdur və biz bu tarixi dərindən öyrənməliyik deyə bildirib.
Sonra geniş məruzə ilə çıxış edən YAP Veteranlar Şurasının üzvü Əli Həsənov Heydər Əliyevin uzaqgörən daxili və xarici siyasətinin tarixi və geosiyasi paralellərini təhlil edib. Natiq, dahi şəxsiyyətin hələ sovet rejiminin ən totalitar dövrlərində belə, Kremllə münasibətləri necə böyük diplomatik məharətlə idarə etdiyini və Azərbaycanın maraqlarını hər şeydən uca tutduğunu vurğulayıb.
O qeyd edib ki, Ulu Öndər çox uzaqgörən bir strateq idi. O, yaxşı bilirdi ki, bir millətin gələcəkdə müstəqil dövlət kimi var ola bilməsi üçün onun mütləq peşəkar ordusu və güclü kadr potensialı olmalıdır. Sovet ittifaqı dövründə azərbaycanlıların hərbi elmlərə yiyələnməsinə qısqanclıqla yanaşılırdı. Lakin Heydər Əliyev böyük cəsarət və inzibati resurslar hesabına Bakıda Cəmşid Naxçıvanski adına hərbi liseyin yaradılmasına nail oldu. Moskvadan gələn bütün təzyiqlərə və maneələrə rəğmən, o, bu məktəbi qorudu. Məhz həmin məktəbdə yetişən azərbaycanlı hərbçilər sonradan həm Birinci Qarabağ Müharibəsində, həm də İkinci Vətən Müharibəsində bizim ordumuzun onurğa sütununu təşkil etdilər. Eyni zamanda Heydər Əliyev Azərbaycanda elə bir istehsalat və sənaye potensialı yaratdı ki, SSRİ dağılanda ölkəmiz özü-özünü təmin edə biləcək bir neçə respublikadan biri oldu. Buna görə də, 14 iyul sadəcə keçmişə aid bir xatirə deyil, o, milli rəhbərin xalqa xidmət fəlsəfəsinin, Azərbaycan intibahının və böyük qurtuluş yolunun rəsmi başlanğıc xəttidir.
Ulu Öndər Heydər Əliyevin "Təhsil millətin gələcəyidir" strateji kəlamını xatırladan natiq qeyd edib ki, Heydər Əliyevin rəhbərliyi dövründə təhsil sistemində inqilabi addımlar atıldı. Hələ 1970-ci illərdən başlayaraq hər il yüzlərlə, minlərlə azərbaycanlı gəncin SSRİ-nin ən nüfuzlu, aparıcı ali məktəblərinə, Moskva, Leninqrad, Kiyev kimi elm mərkəzlərinə göndərilməsi təsadüfi bir hadisə deyil, uzaq gələcəyə hesablanmış dahi bir strateji proqram idi. Ulu Öndər yaxşı bilirdi ki, gün gələcək, Azərbaycan müstəqil olacaq və bu dövləti idarə etmək üçün milli, savadlı, yüksək intellektual kadrlar tələb olunacaq. O, həmin milli kadrları məhz sovet dövründə yetişdirirdi. Dövlət idarəçiliyində, elmdə, iqtisadiyyatda bu gün uğur qazanan kadrların böyük bir qismi məhz həmin uzaqgörən siyasətin bəhrəsidir. Heydər Əliyev müəllim əməyinə, alimə, ziyalıya ən yüksək qiyməti verən bir rəhbər idi. Bu gün dahi rəhbərin təhsil və gənclər strategiyası ölkəmizin qlobal dünyadakı uğurlarının əsas hərəkətverici qüvvəsidir. Sevindirici haldır ki, bu xətt Prezident İlham Əliyev və Birinci vitse-prezident Mehriban xanım Əliyeva tərəfindən ən yüksək səviyyədə davam etdirilir, Azərbaycan gəncliyi dünyanın ən qabaqcıl universitetlərində dövlət xətti ilə təhsil alır deyə fikrini tamamlayıb.
Daha sonra çıxış edən Yeni Azərbaycan Partiyası Veteranlar Şurasının üzvü, məşhur “91-lər”in tanınmış nümayəndəsi Şahlar Əsgərov müstəqilliyimizin ilk illərində ölkənin üzləşdiyi ağır geosiyasi böhranlardan, xaosdan və YAP-ın yaradılmasının tarixi zərurətindən bəhs edib. O, Heydər Əliyev dühasının xilaskarlıq missiyasını şəxsi xatirələri fonunda şərh edərək deyib: "Biz 1990-cı illərin əvvəllərində Azərbaycanın necə bir uçuruma sürükləndiyini, daxili çəkişmələr ucbatından torpaqlarımızın itirildiyini və ölkənin parçalanma təhlükəsi ilə üz-üzə qaldığını yaşayaraq gördük. Həmin çətin günlərdə xalqın yeganə ümid yeri Naxçıvanda blokada şəraitində yaşayan Heydər Əliyev idi. Biz - '91-lər' olaraq Ümummilli Liderə məşhur müraciəti ünvanlayarkən və Yeni Azərbaycan Partiyasının əsasını qoyarkən yaxşı dərk edirdik ki, bu xalqı, bu dövləti məhv olmaqdan xilas edə biləcək yeganə qüvvə məhz Heydər Əliyev şəxsiyyətidir, onun böyük dövlətçilik təcrübəsidir. Ulu Öndərin 1969-cu ildə başladığı böyük quruculuq missiyası, 1993-cü ildə xalqın təkidli tələbi ilə yenidən dövlətin xilasına yönəldi. Heydər Əliyev yolu təkcə siyasi kurs deyil, o, elmi əsaslara, dərin məntiqə, milli dəyərlərə və sarsılmaz dövlətçilik təfəkkürünə söykənən bir məktəbdir. Biz bu gün gənclərimizə aşılamalıyıq ki, bu müstəqillik asan qazanılmayıb və onun memarı olan Heydər Əliyevin ideyalarını qorumaq, yaşatmaq hər bir azərbaycanlının mənəvi və vətəndaşlıq borcudur."
Tədbirdə yekun nitq ilə çıxış edən Yasamal Rayon İcra Hakimiyyətinin başçısı Elşad Həsənov Ulu Öndər Heydər Əliyev strategiyasının bu gün yeni tarixi mərhələdə görünməmiş zəfərlərlə taclandığını diqqətə çatdırıb: "Bu gün bu salonda əyləşən hər bir kəs, hər bir azərbaycanlı son dərəcə qürurlu və xoşbəxtdir. Çünki dahi rəhbər Ümummilli Lider Heydər Əliyevin 14 iyul 1969-cu ildə əsasını qoyduğu dövlətçilik xətti, onun layiqli davamçısı, Ümummilli Liderin siyasi məktəbinin ən böyük yetirməsi olan Möhtərəm Prezidentimiz, Müzəffər Ali Baş Komandan İlham Əliyev tərəfindən özünün ən uca zirvəsinə daşınıb. Ulu Öndərin ən böyük vəsiyyəti, onun qəlbindəki ən böyük arzusu Şuşanın, Qarabağın işğaldan azad edilməsi, ərazi bütövlüyümüzün və suverenliyimizin tam bərpa olunması idi. Müzəffər Ali Baş Komandanımızın rəhbərliyi ilə rəşadətli ordumuz 44 günlük Vətən Müharibəsində və cəmi 23 saatlıq antiterror tədbirlərində dahi rəhbərin bu vəsiyyətini şərəflə yerinə yetirdi. Bu gün Şuşada, Xankəndidə, Xocalıda və Qarabağın hər bir nöqtəsində üçrəngli dövlət bayrağımız əzəmətlə dalğalanır. 1969-cu ildə əkilən dövlətçilik ağacı bu gün özünün ən möhtəşəm, ən şanlı bəhrəsini verib. Azərbaycan hazırda öz tarixinin ən güclü, ən qüdrətli dövrünü yaşayır. Bizim hər birimizin mənəvi borcu bu dahi rəhbərin ideyalarına sonadək sadiq qalmaq, Prezident İlham Əliyevin ətrafında polad kimi sıx birləşərək güclü Azərbaycanın daha da çiçəklənməsi naminə gecə-gündüz çalışmaqdır deyə çıxışını yekunlaşdırıb
Çıxışlardan sonra fəxri fərmanlar, hədiyyələr və partiya sıralarına yeni qoşulan üzvlərə üzvlük vəsiqələri təqdim edilib.
Sonra Yeni Azərbaycan Partiyasının Himni səsləndirilib.
Sonda xatirə şəkli çəkdirilib.
17:03 14.07.2026
Oxunuş sayı: 44
