Xuraman Muradovanın Prezident İlham Əliyevə həsr olunmuş yeni kitabının təqdimatı keçirildi
AMEA Mərkəzi Elmi Kitabxanasında Milana Medicalın təsisçisi, iş qadını və yazar Xuraman Muradovanın Müzəffər Ali Baş Komandan İlham Əliyevə həsr etdiyi “Əsrin qəhrəmanı olan Komandan” kitabının təqdimat mərasimi keçirilib. Tədbir ölkənin tanınmış elm, ədəbiyyat, media nümayəndələrinin, diplomatların, millət vəkillərinin və ziyalıların iştirakı ilə baş tutub.
Kitab Prezident İlham Əliyevin xalq üçün yaşadığı şərəfli ömür yolundan, onun liderliyində Azərbaycanın tarixi Zəfəri ilə nəticələnən “Dəmir Yumruq” əməliyyatından bəhs edir. “Əsrin qəhrəmanı olan Komandan” Xuraman Muradovanın Azərbaycan xalqının liderinə olan sonsuz sevgisinin və dərin vəfa borcunun təcəssümüdür. Təqdimatda müəllifin daha əvvəl işıq üzü görmüş “Əsrə bərabər 20 il” kitabı da iştirakçılara təqdim edilib.
Tədbir xalq yazıçısı Çingiz Abdullayevin rəhbərliyi və aparıcılığı ilə keçirilib. Tədbirdə Özbəkistan Respublikasının ölkəmizdəki fövqəladə və səlahiyyətli səfiri Bahrom Aşrafxanov, Beynəlxalq Türk Mədəniyyəti və İrsi Fondunun prezidenti Aktoti Raimkulova, xalq yazıçısı Natiq Rəsulzadə, Milli Məclisin deputatları Jalə Əliyeva, Vüqar İsgəndərov, Razi Nurullayev, Qazaxıstan-Azərbaycan Dostluq Cəmiyyətinin sədri Eldar Günaydın, sənətşünaslıq üzrə fəlsəfə doktoru, "Xəzərin sahilindən " layihəsinin rəhbəri, tele-aparıcı Fəxriyyə Lilpar İsayeva və digər tanınmış şəxslər çıxış edərək kitab haqqında fikirlərini bölüşüblər.
Xüsusi qonaq olaraq tədbirdə iştirak edən Qazaxıstan və Qırğızıstan Yazıçılar Birliyinin Özbəkistan Koordinatoru Muginqam Nurbayev çıxış edərək Xuraman Muradovanın yaradıcılığının təkcə Özbəkistanda, Qazaxıstanda, Türkiyədə deyil, bütün Türk dünyasında sevgiylə, rəğbətlə qarşılandığını vurğulamış və Xuraman xanıma "Əhməd Yəsəvi" medalını, Qazaxıstanda fəaliyyət göstərən "Dünya İstedadları" Birliyinin fəxri mükafatını təqdim etmişdir.
Təqdimat mərasimində çıxış edənlər kitabı yüksək qiymətləndirərək onun təkcə tarixi bir əsər deyil, həm də liderlik nümunəsi kimi gələcək nəsillər üçün əvəzsiz bir irs olduğunu bildiriblər. Tədbir boyunca Müzəffər Ali Baş Komandan İlham Əliyevin liderlik keyfiyyətləri və onun Azərbaycanın inkişafında oynadığı misilsiz rol vurğulanıb.
Tədbir iştirakçıları arasında Azərbaycan və xarici ölkələrin elm və ədəbiyyat xadimləri, səfirlər, xalq yazıçıları, qəzet redaktorları, iş adamları və media nümayəndələri yer alıb.
Xuraman Muradova, eyni zamanda, “Əlişir Nəvai” adına Özbəkistan Dövlət Universitetinin fəxri professoru, Özbəkistan Yazıçılar Birliyinin fəxri üzvü və bir çox beynəlxalq mükafatların laureatı olaraq, öz yaradıcılığı və ictimai fəaliyyəti ilə Azərbaycan ədəbiyyatını və mədəniyyətini beynəlxalq səviyyədə layiqincə təmsil edir.
Təqdimat yüksək səviyyədə keçib, müəllif tədbir iştirakçılarına kitabını imzalı nüsxələrini təqdim edib. “Əsrin qəhrəmanı olan Komandan” kitabı Azərbaycanın tarixi Zəfərini və liderlik irsini əks etdirən dəyərli bir əsər kimi Türk dünyası oxucularının diqqətinə təqdim olunub.
Maral
11:21 23.12.2024
Oxunuş sayı: 9461
