TƏBİB: 2024-cü ildə tibb müəssisələrində 32 yerində yoxlama aparılıb, 131 əməkdaş intizam məsuliyyətinə cəlb edilib
TƏBİB-in İcraçı direktoru Vüqar Qurbanov qurumun 2024-cü ilin yekunlarına və 2025-ci ilin planlarına dair keçirilən mətbuat konfransında tibb müəssisələrində aparılan yoxlama və monitorinqlərlə bağlı məlumat verib.
Crossmedia.az xəbər verir ki, V.Qurbanovun sözlərinə görə, cari ilin ilk 11 ayı ərzində daxil olan şikayətlərin araşdırılması məqsədilə 32 yerində yoxlama həyata keçirilib. Nəticədə aşkar edilmiş nöqsanlara görə 131 əməkdaş intizam məsuliyyətinə cəlb olunub.
İcraçı direktor tabeliyində olan tibb müəssisələrində tibbi və inzibati idarəetmənin yoxlanılması məqsədilə həm planlı, həm də növbədənkənar monitorinqlər aparıldığını bildirib:
“29 planlı və 7 növbədənkənar monitorinq həyata keçirilib. Bu proseslərin nəticəsində nöqsanlara yol vermiş 57 əməkdaş intizam məsuliyyətinə cəlb edilib”.
Vüqar Qurbanov sağlamlıq, əməyin təhlükəsizliyi və ətraf mühitlə bağlı yoxlama tədbirlərinin də xüsusi diqqət mərkəzində olduğunu vurğulayıb:
“85 tibb müəssisəsində yerində yoxlamalar aparılıb və aşkarlanmış uyğunsuzluqların aradan qaldırılması istiqamətində həmin müəssisələrə köməklik göstərilib”.
Konfransda qeyd edilib ki, TƏBİB gələcəkdə də tibbi xidmətlərin keyfiyyətinin artırılması və idarəetmənin təkmilləşdirilməsi istiqamətində nəzarət tədbirlərini davam etdirəcək.
Nihat Tahirov
10:10 23.12.2024
Oxunuş sayı: 21089
