TƏBİB: Bir sıra tibb müəssisələrində əsaslı təmir və yenidənqurma işləri aparılır
TƏBİB-in İcraçı direktoru Vüqar Qurbanov 2024-cü ilin yekunlarına və 2025-ci ilin planlarına dair keçirilən mətbuat konfransında ölkənin tibb müəssisələrində həyata keçirilən təmir və yenidənqurma işləri barədə məlumat verib.
Crossmedia.az xəbər verir ki, V.Qurbanov qeyd edib ki, tibb sahəsində infrastrukturun yenilənməsi məqsədilə bir sıra əhəmiyyətli layihələr icra olunur:
“Tibb müəssisələrində daşınmaz əmlakın əsaslı təmiri, yüngül inşaat konstruksiyalarından inşa edilən və asanlıqla quraşdırılıb-sökülə bilən tikililərin, həmçinin kənd yerlərində modul tipli tibb məntəqələrinin tikintisi və quraşdırılması TƏBİB tərəfindən həyata keçirilir”.
İcraçı direktor Vüqar Qurbanov əsas təmir və tikinti işləri barədə məlumat verərək bildirib:
“Klinik Tibbi Mərkəzin iki əsas korpusunun əsaslı təmir layihələndirilməsi üçün tender prosesinə start verilib. Eyni zamanda, Respublika Klinik Xəstəxanasında tam əsaslı təmir işlərinə başlanılıb. Nərimanov Tibb Mərkəzinin yenidən qurulması layihəsi isə hazırda icra olunmaqdadır. Bu layihələr müasir standartlara uyğun tibbi infrastrukturun yaradılmasını hədəfləyir”.
Vüqar Qurbanov həmçinin kənd yerlərində səhiyyə xidmətlərinin əlçatanlığını artırmaq məqsədilə modul tipli tibb məntəqələrinin inşasının davam etdirildiyini bildirib. Bu məntəqələr asanlıqla quraşdırılır və sökülə bilən texnologiyalar əsasında inşa edilir, bu da onların regionlarda istifadəsini daha səmərəli edir.
Konfransda vurğulanıb ki, görülən işlər əhalinin tibbi xidmətlərə çıxışını artırmaq və göstərilən xidmətlərin keyfiyyətini yüksəltmək məqsədini daşıyır. 2025-ci ildə də bu istiqamətdə yeni layihələrin həyata keçirilməsi planlaşdırılır.
Nihat Tahirov
08:54 23.12.2024
Oxunuş sayı: 17642
