TƏBİB: 2024-cü ildə qazilər və şəhid ailələri üçün 412 mindən çox tibbi xidmət göstərilib
TƏBİB-in İcraçı direktoru Vüqar Qurbanov qurumun 2024-cü ilin yekunlarına və 2025-ci ilin planlarına dair keçirilən mətbuat konfransında cari ildə qazilər və şəhid ailələrinə göstərilən tibbi xidmətlərlə bağlı məlumat verib.
Crossmedia.az xəbər verir ki, Vüqar Qurbanovun sözlərinə görə, cari ilin ilk 11 ayı ərzində 10 min 284 qazinin 87 min 757 müraciəti qeydə alınıb və bu müraciətlər əsasında 251 min 82 tibbi xidmət göstərilib. Bununla yanaşı, şəhid ailələrinin üzvlərinə də geniş tibbi dəstək təmin olunub:
“Şəhidlərimizin ailə üzvlərindən 6 min 43 nəfərin 46 min 526 müraciətinə əsasən 161 min 901 tibbi xidmət göstərilib”, – deyə icraçı direktor bildirib.
Vüqar Qurbanov həmçinin əlilliyin qiymətləndirilməsi ilə bağlı görülən işlərə də toxunub. O qeyd edib ki, “Əlilliyin qiymətləndirilməsi məqsədilə tibbi-sosial ekspertiza müayinəsinə göndərişlərin verilməsi Qaydası”na uyğun olaraq Həkim Məsləhət Komissiyalarının yekun siyahısı hazırlanıb və bu hüquqa malik TƏBİB tabeli tibb müəssisələrinin sayı 24-ə çatdırılıb.
“2024-cü il ərzində əlilliyin qiymətləndirilməsi məqsədilə tibb müəssisələri tərəfindən 61 min 260 nəfər üçün göndəriş rəsmiləşdirilib və müvafiq olaraq Tibbi-Sosial Ekspert Komissiyasına təqdim olunub”, – deyə o əlavə edib.
TƏBİB-in İcraçı direktoru, həmçinin, Azərbaycan Respublikasının Səfərbərlik və Hərbi Xidmətə Çağırış üzrə Dövlət Xidməti ilə əməkdaşlıq çərçivəsində başlanılan yeni pilot layihəni də açıqlayıb.
“Xaçmaz, Qusar, Quba, Şabran və Siyəzən rayonlarının inzibati əraziləri üzrə ilkin hərbi qeydiyyata alınan, hərbi xidmətə çağırılan və ehtiyatda olan vətəndaşların tibbi müayinəsinə dair layihəyə start verilib,” – deyə o qeyd edib.
Konfransda bu sahələrdə işlərin 2025-ci ildə də davam etdiriləcəyi vurğulanıb.
Nihat Tahirov
08:50 23.12.2024
Oxunuş sayı: 20974
