Cərimələri artırmağa yox, qəzaları azaltmağa çalışın - Çağırış edildi
Azərbaycanda son illər yol hərəkəti qaydalarının pozulmasına görə tətbiq edilən cərimələrin məbləği mərhələli şəkildə artırılır. Bu addımların əsas məqsədi sürücüləri qayda pozuntularından çəkindirmək, yol hərəkəti intizamını gücləndirmək və qəzaların sayını azaltmaqdır. Lakin statistik göstəricilər göstərir ki, cərimələrin artırılması pozuntuların əhəmiyyətli dərəcədə azalmasına tam səbəb olmur. Mütəxəssislər hesab edirlər ki, yol hərəkəti təhlükəsizliyinin təmin olunması üçün yalnız cəza mexanizmləri deyil, kompleks yanaşma vacibdir.
Mövzu ilə bağlı Crossmedia.az-a açıqlama verən nəqliyyat məsələləri üzrə ekspert Adil Nəbiyev bildirib ki, cərimənin effektivliyi ilk növbədə onun məbləği ilə deyil, qanunun qaçılmaz tətbiqi prinsipi ilə ölçülür: "Sürücü əmin olmalıdır ki, etdiyi hər bir qayda pozuntusu mütləq aşkarlanacaq və buna görə məsuliyyət daşıyacaq. Dünyanın inkişaf etmiş ölkələrinin təcrübəsi də göstərir ki, pozuntunun aşkarlanma ehtimalı yüksək olduqda, daha aşağı məbləğdə cərimələr belə sürücülərin davranışına ciddi təsir göstərir".
Onun sözlərinə görə, nəzarətin zəif olduğu şəraitdə yüksək cərimələr də istənilən nəticəni vermir: "Əsas problemlərdən biri də sürücülük mədəniyyətidir. Bəzi sürücülər sürət həddini aşmağı, təhlükəli ötmə etməyi və ya işıqforun qırmızı işığında keçməyi adi davranış kimi qəbul edir, bəziləri isə cəriməni əvvəlcədən hesablanmış risk sayır. Bununla yanaşı, yol infrastrukturu da təhlükəsizliyə birbaşa təsir göstərir. Aydın görünməyən yol nişanları, silinmiş nişanlanma xətləri, zəif işıqlandırılan küçələr, təhlükəli yolayrıcları və hərəkətin təşkilindəki çatışmazlıqlar qəzaların artmasına səbəb olan amillərdəndir. Maarifləndirmə tədbirləri məktəb yaşlarından başlamalı, sürücülük məktəblərində təhlükəsiz idarəetmə bacarıqlarına daha çox önəm verilməli, sosial layihələr və media kampaniyaları genişləndirilməlidir. Peşəkar sürücülər üçün dövri təlimlərin keçirilməsi, elektron nəzarət sistemlərinin və ağıllı kameraların tətbiqinin genişləndirilməsi, eləcə də qanunların hər kəsə bərabər şəkildə tətbiq olunması yol hərəkəti təhlükəsizliyinin artırılmasına mühüm töhfə verə bilər. Məqsəd cərimələrin sayını artırmaq deyil, insanların həyatını qorumaq, qəzaların sayını azaltmaq və təhlükəsiz yol hərəkəti mədəniyyətini formalaşdırmaq olmalıdır".
Zeynəb Həsən
09:50 11.07.2026
Oxunuş sayı: 141
