Təcili tibbi yardımın rəqəmsallaşdırılması istiqamətində mühüm addımlar atılır
TƏBİB-in İcraçı direktoru Vüqar Qurbanov qurumun 2024-cü ilin yekunlarına və 2025-ci ilin planlarına həsr olunmuş mətbuat konfransında təcili və təxirəsalınmaz tibbi yardımın rəqəmsallaşdırılması ilə bağlı həyata keçirilən işlərdən danışıb.
Crossmedia.az xəbər verir ki, V.Qurbanovun sözlərinə görə, hospitalizasiya proseslərinin elektronlaşdırılması istiqamətində genişmiqyaslı layihələr icra edilib.
“103 Çağrı Mərkəzinin fəaliyyətində innovativ həllər tətbiq olunur, çağırış briqadaları üçün elektron sistem qurulur və təcili tibbi yardımın çağırılma imkanları genişləndirilir. Bu yeniliklərin 2025-ci il ərzində tam tətbiq edilməsi nəzərdə tutulur,” – deyə Vüqar Qurbanov bildirib.
Bundan əlavə, səhiyyə sistemində müxtəlif modulların tətbiqi planlaşdırılır. Vərəm modulu, çarpayı modulu və təxliyə modulu kimi yeniliklər artıq hazırlanıb və 2025-ci ilin ilk aylarında tabeli tibb müəssisələrində istifadəyə veriləcək.
Həmçinin fizioterapiya, şəkərli diabet, epikriz və digər modulların tətbiqi üzrə işlər davam etdirilir. Tibb müəssisələrinin vebsaytlarının yaradılması, TƏBİB-in rəsmi vebsaytının təkmilləşdirilməsi və vətəndaş məmnuniyyətinin artırılması üçün mobil tətbiqlərin hazırlanması da prioritetlər sırasındadır.
Bu yeniliklər Azərbaycanın səhiyyə sistemində xidmətlərin əlçatanlığını artırmaqla yanaşı, onların keyfiyyətini də yüksəltməyi hədəfləyir.
Nihat Tahirov
08:16 23.12.2024
Oxunuş sayı: 4937
