TƏBİB xəstəxana idarəetmə sisteminin mobil versiyasını təqdim edib
TƏBİB-in İcraçı direktoru Vüqar Qurbanov qurumun 2024-cü ilin yekunlarına və 2025-ci ilin planlarına həsr olunmuş mətbuat konfransında yeni texnoloji yeniliklər barədə məlumat verib.
Crossmedia.az xəbər verir ki, V. Qurbanovun sözlərinə görə, xəstəxana idarəetmə sisteminin mobil versiyası hazırlanıb və bu yenilik həkimlərin pasiyent məlumatlarına hər yerdən təhlükəsiz və sürətli çıxışını təmin edəcək.
“Bu sistem diaqnostika və müalicə proseslərini sürətləndirəcək, eyni zamanda pasiyentlərin tibbi tarixçəsinə dərhal çıxış imkanı yaradacaq. Bu, fərdi yanaşmanı təmin etməklə daha effektiv müalicə üsullarının tətbiqinə imkan verəcək,” – deyə V.Qurbanov vurğulayıb. Yeni sistemin 2025-ci ilin birinci rübündə istifadəyə verilməsi planlaşdırılır.
Bundan əlavə, instrumental müayinələrə dair məlumatların mərkəzləşdirilməsi üçün Mərkəzi PACS sistemi qurulub. Artıq 16 tibb müəssisəsinin bütün tibbi avadanlıqları bu sistemə inteqrasiya edilib və 400 minə yaxın pasiyentin məlumatları bazaya daxil edilib.
Qurbanov bildirib ki, “E-tabib” xəstəxana idarəetmə sisteminin təkmilləşdirilməsi, İT infrastrukturunun inkişafı və informasiya təhlükəsizliyinin gücləndirilməsi istiqamətində də mühüm addımlar atılıb.
Bu yeniliklər Azərbaycanın səhiyyə sisteminin rəqəmsallaşması və vətəndaşlara daha yüksək səviyyəli xidmət göstərilməsi istiqamətində mühüm addım kimi qiymətləndirilir.
Nihat Tahirov
08:03 23.12.2024
Oxunuş sayı: 5168
