TƏBİB işə qəbul və tibbi şəhadətləndirmə proseslərini mərkəzləşdirilmiş sistem üzərindən icra edir
TƏBİB-in tabeliyindəki tibb müəssisələrində işə qəbul prosesinin sürətləndirilməsi və şəffaflığın təmin edilməsi məqsədilə mərkəzləşdirilmiş "İşə qəbul modulu" yaradılıb.
Crossmedia.az xəbər verir ki , bu barədə TƏBİB-in İcraçı direktoru Vüqar Qurbanov qurumun 2024-cü ilin yekunlarına və 2025-ci ilin planlarına dair keçirilən mətbuat konfransında məlumat verib.
“Yeni sistemin əsas funksiyası vakansiyaların vahid platforma üzərindən paylaşılması və işə qəbul prosesinin daha əlçatan və sürətli həyata keçirilməsidir,” – deyə V.Qurbanov bildirib.
Bununla yanaşı, çağırışçıların tibbi şəhadətləndirilməsi prosesinin təkmilləşdirilməsi üçün xüsusi altsistem də yaradılıb. Həmin sistem çərçivəsində çağırışçıların tibbi göndərişləri Səfərbərlik və Hərbi Xidmətə Çağırış üzrə Dövlət Xidmətinin elektron informasiya sistemindən qəbul edilir, müvafiq tibbi yoxlamalar TƏBİB-in tabeliyindəki tibb müəssisələrində aparılır və nəticələr yenidən elektron qaydada həmin xidmətin sisteminə ötürülür.
“2024-cü ildə çağırışçıların tibbi qiymətləndirilməsi ilə bağlı 100 minə yaxın elektron müraciət icra edilib. Əgər Dövlət Tibbi-Sosial Ekspertiza və Reabilitasiya Agentliyi və ya Səfərbərlik Xidmətinin rəyinə əsasən təkrar müayinələrə ehtiyac yaranarsa, bu proses də tamamilə elektron sistem vasitəsilə həyata keçirilir,” – deyə V.Qurbanov əlavə edib.
Bu yeniliklər işə qəbul və tibbi şəhadətləndirmə proseslərinin daha effektiv, şəffaf və müasir texnologiyalar əsasında idarə olunmasını təmin edir.
Nihat Tahirov
08:01 23.12.2024
Oxunuş sayı: 8187
