Azərbaycan ilə Latviya Konstitusiya Məhkəmələri arasında ortaq məsələlər müzakirə olunub
Azərbaycan Konstitusiya Məhkəməsinin sədri Fərhad Abdullayev Latviya Konstitusiya Məhkəməsinin sədri İrena Kutsina ilə iki ölkənin Konstitusiya Məhkəmələri arasında ortaq məsələləri müzakirə ediblər
Bu barədə Crossmedia.az-a Konstitusiya Məhkəməsindən məlumat verilib.
Bildirilib ki, Azərbaycanda səfərdə olan Latviya Latviya Konstitusiya Məhkəməsinin nümayəndə heyəti ilə görüşdə Fərhad Abdullayev Azərbaycan ilə Latviya arasında mövcud olan dostluq münasibətlərinin, qarşılıqlı hörmət və etimada əsaslanan əməkdaşlığın son illər ərzində dinamik inkişaf etdiyini məmnunluqla qeyd edib. Bu münasibətlərə Prezident İlham Əliyevin dəvəti ilə Latviya Prezidenti Edqars Rinkeviçsin bu ilin aprel ayında Azərbaycana rəsmi səfərindən sonra yeni təkan verilib.
Bildirilib ki, dövlətlər arasında siyasi, iqtisadi, humanitar və digər sahələrdə formalaşmış səmərəli tərəfdaşlıq münasibətləri məhkəmə-hüquq sahəsində də uğurla davam etdirilir. Bu baxımdan, Konstitusiya Məhkəmələri arasında əməkdaşlığın inkişaf etdirilməsi, Konstitusiyanın aliliyinin təmin edilməsində qarşılıqlı təcrübə mübadiləsinin genişləndirilməsi xüsusi əhəmiyyət kəsb edir.
Sədr qonaqlara respublikada hüquqi dövlət quruculuğu istiqamətində həyata keçirilən ardıcıl islahatlar, məhkəmə-hüquq sisteminin müasirləşdirilməsi, məhkəmə hakimiyyətinin müstəqilliyinin möhkəmləndirilməsi barədə ətraflı məlumat verib. Fərhad Abdullayev Konstitusiya Məhkəməsinin əsas fəaliyyət istiqamətləri və qərar qəbul etmə proseduru, konstitusiya nəzarətinin həyata keçirilməsi, eyni zamanda, məhkəmənin qərarlarında əks olunmuş hüquqi mövqelərin hüquq sisteminin inkişafında əhəmiyyəti barədə danışıb.
Latviya Konstitusiya Məhkəməsinin sədri İrena Kutsina səmimi qəbula görə təşəkkürünü bildirərək, rəhbərlik etdiyi qurumun fəaliyyəti, konstitusiya nəzarətinin həyata keçirilməsi sahəsində formalaşmış təcrübə, habelə, vətəndaşların konstitusion hüquqlarının müdafiəsi istiqamətində qəbul olunan qərarlar barədə ətraflı məlumat verib.
Xanım sədr qeyd edib ki, konstitusiya ədalət mühakiməsi orqanlarının qarşısında duran ortaq məsələlər ətrafında geniş müzakirə və fikir mübadiləsinin aparılması olduqca faydalıdır.
Daha sonra hər iki ölkənin Konstitusiya Məhkəmələrinin hakimləri və Aparatlarının məsul əməkdaşlarının iştirakı ilə formalaşmış məhkəmə təcrübəsi, konstitusiya nəzarətinin aktual məsələləri, Konstitusiyada təsbit edilmiş hüquq və azadlıqların müdafiəsinin müasir mexanizmləri, rəqəmsal transformasiya şəraitində məhkəmə fəaliyyətinin təşkili, süni intellekt texnologiyalarının tətbiqi, məhkəmə təcrübəsinin vahidliyinin təmin edilməsi, eləcə də qarşılıqlı maraq doğuran digər hüquqi məsələlər ətrafında geniş fikir mübadiləsi aparılıb.
Görüş iştirakçıları ikitərəfli əməkdaşlığın gələcəkdə də davam etdirilməsinin mütərəqqi hüquqi yanaşmalar əsasında konstitusiya nəzarətinin səmərəliliyinin artırılmasına mühüm töhfə verəcəyini bildiriblər.
15:22 10.07.2026
Oxunuş sayı: 42
