IX sinif buraxılış imtahanlarında yeni tapşırıq modeli tətbiq ediləcək - AÇIQLAMA
Dövlət İmtahan Mərkəzinin (DİM) mətbuat katibi Xanlar Xanlarzadə IX sinif buraxılış imtahanlarında kiçik bir dəyişiklik ediləcəyini bildirib. Yenilik yalnız Xarici Dil fənni ilə bağlı olacaq və imtahan suallarının modelinə yeni bir tapşırıq daxil ediləcək.
Xanlar Xanlarzadənin Crossmedia.az-a olan sözlərinə əsasən, yeni tapşırıq şagirdlərə bir-biri ilə əlaqəli üç şəkil təqdim olunmasını nəzərdə tutur. Şagirdlər həmin şəkillərə baxaraq onları təsvir etməli, şəkillər arasında əlaqə quraraq obrazlar və hadisələr haqqında qısa mətn yazmalıdırlar.
“Bu tapşırıq minimal olaraq 35-50 sözlük bir mətn tələb edir. Məqsəd şagirdlərin təsvir və məntiqi əlaqə qurma bacarıqlarını yoxlamaqdır,” - deyə mətbuat katibi vurğulayıb.
Digər fənlər üzrə, o cümlədən Tədris Dili və Riyaziyyat imtahanlarında isə heç bir dəyişiklik olmayacaq. Beləliklə, əsas yenilik yalnız Xarici Dil fənninə aiddir və bu tapşırıq modeli ilk dəfə bu il tətbiq ediləcək.
Nihat Tahirov
15:38 20.12.2024
Oxunuş sayı: 5716
