Azərbaycan və Rusiya alimləri Xəzəryanı ərazilərdə tədqiqat aparıblar
Azərbaycan Botaniklər Cəmiyyəti İctimai Birliyinin (ABCİB) həyata keçirdiyi “Azərbaycanın Xəzəryanı sahillərində karbon emissiyasını azaldan yosun biokultivatorlarının yaradılması” layihəsi çərçivəsində Botanika İnstitutunun və Çelyabinsk Dövlət Universitetinin alimləri müştərək ekspedisiyalar həyata keçiriblər.
Crossmedia.az xəbər verir ki, ekspedisiyanın məqsədi Azərbaycanın Xəzəryanı ərazilərində karbon emissiyasına həssas olan yosun növlərinin toplanması, biokultivasiya üçün uyğun su obyektinin tapılması, kimyəvi analiz üçün su nümunələrinin götürülməsi olub.
Lənkəran rayonunun Siyavər və Kənarmeşə kəndləri, Qızılağac qoruğu, Şabran rayonunun Xəzəryanı və Salyan rayonunun Şirvan Milli Parkı ərazilərindən toplanan nümunələr üzərində laborator şəraitdə alqoloji tədqiqatlar aparılıb. Müxtəlif təyinedicilərdən istifadə edilərək yosunların növ müxtəlifliyi müəyyənləşdirilib.
Aparılan tədqiqatların davamı olaraq karbon qazının emissiyasını azaldan yosun növlərinin kolleksiyası yaradılacaq, yosunların becərilməsi üçün biotexnoloji üsulların və akvakultura sahəsində yosunlardan alınan məhsulların istifadəsi öyrəniləcək.
13:00 19.12.2024
Oxunuş sayı: 18157
