Xarici xəbərlər

Metsamor AES ətrafında Rusiya və Qərb gərginliyi artır

Ermənistan hakimiyyəti Metsamor Atom Elektrik Stansiyasında Qərb podratçıları ilə əməkdaşlıq etdiyini təsdiqləyib. Məlumata görə, stansiyada həyata keçirilən bəzi layihələrdə Avropa İttifaqının maliyyələşdirdiyi və Qərb şirkətlərinin iştirak etdiyi proqramlar icra olunur.

Crossmedia.az "Tass" xəbər agentliyinə istinadən xəbər verir ki, AES-in mətbuat xidmətinin açıqlamasında bildirilib ki, Slovakiyanın "VÚEZ"şirkəti tərəfindən təchiz edilən və Avropa İttifaqı tərəfindən maliyyələşdirilən alternativ su təchizatı avadanlığı zavod və qəbul sınaqlarından uğurla keçib. Avadanlığın texniki tələblərə tam uyğun olduğu vurğulanıb.

Açıqlamada qeyd olunub ki, Avropa Birliyi Ermənistanın nüvə təhlükəsizliyinin gücləndirilməsi məqsədilə əlavə stress-test tədbirlərinin həyata keçirilməsinə dəstək verir. Bu dəstəyə texniki ekspertiza, həmçinin ağır qəza hallarında təhlükəsizliyin təmin olunmasına yönəlmiş müasir avadanlıqların təqdim edilməsi daxildir.

Bildirilir ki, qəbul sınaqlarında AES əməkdaşları, Aİ-nin məsləhətçiləri və Avropa Kommissiyası nümayəndələri iştirak ediblər.

Qeyd edək ki, bundan əvvəl Rusiya Təhlükəsizlik Şurasının katibi Sergey Şoyqu Ermənistanın atom elektrik stansiyasında Qərb podratçıları ilə əlaqələndirilməmiş işlərin aparıldığı barədə xəbərdarlıq etmişdi. Bu açıqlamalar fonunda İrəvanın Qərb strukturları ilə nüvə təhlükəsizliyi sahəsində əməkdaşlığı yenidən diqqət mərkəzinə gəlib.

🖨 Çap et

17:34 16.06.2026

Oxunuş sayı: 47