TƏBİB ahıl və həssas qruplara daxil olan şəxslərin, uşaq, hamilə və zahı qadınların yerində müşahidəsini aparmaq, tibbi xidmətlərə əlçatanlığı təmin etmək, o cümlədən icbari tibbi sığortanın yaratdığı imkanlar çərçivəsində təqdim olunan xidmətlərlə bağlı maarifləndirmə işinin gücləndirilməsinə dəstək məqsədilə kənd yerlərində tibbi müayinə tədbirlərini davam etdirir.
Crossmedia.az xəbər verir ki, Hacıqabul Rayon Mərkəzi Xəstəxanasının ixtisaslı həkim heyətinin iştirakı ilə "Sağlam gələcək" devizi altında Nəvahi kənd həkim məntəqəsində sakinlərin tibbi müayinəsi həyata keçirilib.
Tibbi aksiyada terapevt, pediatr, uroloq, dermatoloq, şüa- diaqnostika üzrə həkim, ginekoloq, kardioloq və psixoloqun iştirakı ilə əhalinin sağlamlıqla bağlı şikayətləri dinlənilib, zəruri instrumental müayinələr aparılıb.
Aksiya çərçivəsində 200-dən çox şəxsin müayinələri təşkil edilib, 300-ə qədər tibbi xidmət icra olunub.
Müayinələr zamanı ixtisaslı tibbi xidmətlərə ehtiyac yarandığı təqdirdə sakinlərin aidiyyəti üzrə tibb müəssisələrinə yönləndirilməsi təmin edilib.
