Qazaxıstan neftinin Azərbaycan ərazisindən nəqlinin bir çox üstünlükləri var - Açıqlama
Qazaxıstan neft ixracının şaxələndirilməsi məqsədilə alternativ marşrutları nəzərdən keçirməyə davam edir. Ölkənin energetika naziri Erlan Akkenjanov bildirib ki, mümkün istiqamətlər arasında Bakı-Supsa neft kəməri də yer alır. Nazir qeyd edib ki, Azərbaycan tərəfi ilə bu məsələ üzrə hələlik rəsmi danışıqlar aparılmayıb və hər hansı tarif məsələsi də müzakirə olunmayıb.
Mövzu xüsusilə Bakı-Supsa neft kəmərinin fəaliyyətinin bərpası ilə bağlı Azərbaycan və Gürcüstan arasında əldə olunan son razılaşmadan sonra diqqət mərkəzinə düşüb. Vaxtilə “Azəri-Çıraq-Günəşli” yataqlar blokundan hasil edilən neftin ixracında mühüm rol oynayan kəmər 2022-ci ilin yazından fəaliyyətini dayandırsa da, onun yenidən işə salınması regionun enerji və tranzit imkanları baxımından yeni perspektivlər yarada bilər.
Məsələ ilə bağlı iqtisadçı ekspert Eldəniz Əmirov Crossmedia.az-la öz fikirlərini bölüşüb:
"Qazaxıstan neftinin Azərbaycan üzərindən Qərb bazarlarına nəqli artıq praktikada tətbiq olunan bir modeldir və bu proses Bakı-Tbilisi-Ceyhan neft kəməri vasitəsilə həyata keçirilir. Bu istiqamətdə müəyyən təcrübə formalaşıb və nəql prosesi artıq bir neçə ildir davam etdirilir. Eyni zamanda, neftin Bakı-Supsa neft kəməri marşrutu vasitəsilə də daşınması mümkündür.
Bu əməkdaşlıq həm Qazaxıstan, həm də Azərbaycan üçün iqtisadi və strateji baxımdan əlverişli hesab olunur. Xüsusilə Azərbaycanın neft hasilatının müəyyən qədər azalması fonunda mövcud ixrac boru kəmərlərinin tam gücü ilə işləməsi və istifadəsiz qalmaması mühüm əhəmiyyət daşıyır. Bu isə ölkə iqtisadiyyatına əlavə töhfələr verir, tranzit imkanlarını genişləndirir və Azərbaycanın enerji-logistika mərkəzi kimi rolunu daha da gücləndirir.
Bununla yanaşı, Azərbaycan Şərqlə Qərb arasında strateji körpü rolunu bir daha möhkəmləndirmiş olur. Regionda enerji təhlükəsizliyinin təmin edilməsində iştirak edən əsas ölkələrdən biri kimi Azərbaycanın geosiyasi və iqtisadi əhəmiyyəti daha da artır".
Elmir Heydərli
17:40 29.05.2026
Oxunuş sayı: 55
