Türk ölkələrinin ortaq hüquq lüğətinin tərtib olunması planlaşdırılır
Hazırkı dövrdə transmilli cinayətkarlıq, insan hüquq və azadlıqlarının təmin edilməsi, ekoloji problemlər, beynəlxalq miqyasda ticarət mübahisələri, insan alveri və miqrasiya ilə bağlı məsələlər hüquq münasibətlərində transmilli aspektlər olmaqla vəkillərin üzərinə daha böyük vəzifələr qoyur. Xüsusilə insan hüquq və azadlıqlarının müdafiəsi transmilli hüquq münasibətlərində hər zaman mühüm yer tutur. Həmin sahədə peşəkar hüquqi yardımın əhəmiyyət daşıması isə beynəlxalq sənədlərlə və dövlətlərin milli qanunvericilik aktları ilə müəyyən edilib. Bunu nəzərə alaraq, hüquqi yardım sahəsində qardaş türk dövlətləri arasında birgə əməkdaşlıq formalarının işlənib hazırlanması, qarşılıqlı hüquqi yardım istiqamətlərinin genişləndirilməsi zəruriliyi ortaya çıxır.
Bunu Vəkillər Kollegiyasının sədri Anar Bağırov “Hüquq münasibətlərində transmilli aspektlər: müasir çağırışlar və hədəflər” mövzusunda beynəlxalq konfransda deyib.
Anar Bağırov bildirib ki, peşəkar hüquqi yardım göstərən vəkillik təsisatları birgə fəaliyyət göstərməlidir. Həmin əməkdaşlıq vəkillərin peşə hazırlıqlarının daha da artırılması, birgə tədrislərin, təlimlərin və s. təşkil edilməsi, milli qanunvericiliklərin qarşılıqlı olaraq öyrənilməsi və yaxınlaşdırılması istiqamətində müəyyən addımların atılması, birgə hüquqi yardım məsələlərinin təmin edilməsi və digər sahələrdə həyata keçirilə bilər.
Aktual məsələlərdən biri də türk dövlətlərinin ortaq hüquq konsepsiyasının və fəaliyyət planının hazırlanması, türk dövlətlərinin hüquq peşələrini bir araya gətirən müştərək hüquq platformasının təsis olunmasıdır. Bu platforma hüquqi bilik və təcrübə mübadiləsini asanlaşdıracaq, hüquq peşələri arasında əməkdaşlığı genişləndirəcək və ortaq hüquqi problemlərə daha effektiv və çevik həll yolları tapmağa şərait yaradacaq. Platforma, eyni zamanda, transmilli cinayətlərin qurbanlarına keyfiyyətli hüquqi yardım standartlarının işlənib hazırlanması və lazım olduqda onlara Pro Bono hüquqi yardımın göstərilməsi əsaslarının müəyyən edilməsi üçün də bir baza rolunu oynaya bilər.
Sədr qeyd edib ki, hüquqşünas kadrların hazırlanmasında irəliləyişə nail olunması hüquq münasibətlərində transmilli aspektlərin hüquqi tənzimlənməsinin əsaslarından biridir. Bu zaman hüquqşünas kadrların hazırlanması üzrə bakalavr və magistratura istiqamətlərində ikili diplom proqramlarının qurulması əhəmiyyətli olardı. Həmçinin birgə hüquq nəşrlərinin dərc edilməsi, bu sahədə türk ölkələrinin hüquq sistemlərinin müqayisəli öyrənilməsi və ortaq hüquq lüğətinin tərtib olunması da bizim üçün prioritet məsələlərdən olmalıdır.
“İqtisadi əməkdaşlığın inkişafı ortaq mübahisələrin alternativ həlli institutlarının təşkilini zəruri edir. Belə institutlar iqtisadi mübahisələrin vaxtında və səmərəli həllinə kömək edəcək, işgüzar dairələr arasında inam və əməkdaşlığı gücləndirəcək. Həmin institutlar, həmçinin hüquqi proseslərin sürətlənməsinə və məhkəmə yüklərinin azalmasına töhfə verəcək”, - deyə o əlavə edib.(AZƏRTAC)
08:32 17.12.2024
Oxunuş sayı: 5725
