Müsabiqə qalibi: “Yüksəliş” mənim üçün bir yarışdan daha böyük məna daşıyır - MÜSAHİBƏ
Son illərdə ölkəmizdə həyata keçirilən “Yüksəliş” müsabiqəsi qısa müddət ərzində cəmiyyətin böyük marağına səbəb olan, peşəkarlıq və şəffaflıq prinsiplərinə əsaslanan nüfuzlu bir platformaya çevrilib. Layihənin əsas missiyası yüksək intellektual potensiala malik, idarəetmə bacarıqları ilə seçilən gəncləri üzə çıxarmaq, onların bilik və təcrübəsini daha geniş miqyasda tətbiq etmək üçün yeni imkanlar yaratmaqdır. Bu təşəbbüs dövlətimizin insan kapitalının inkişafına, xüsusən də istedadlı və məqsədyönlü gənclərə göstərdiyi diqqətin bariz təzahürüdür. Müsabiqənin əvvəlki illərdəki finalçılarının bu gün ölkənin müxtəlif sahələrində mühüm qərarların icrasında yaxından iştirak etməsi “Yüksəliş”in praktiki nəticələrinin və təsir gücünün ən parlaq göstəricisidir. Layihə həm idarəetmədə innovativ yanaşmanı təşviq edir, həm də keyfiyyətli kadr ehtiyatının formalaşmasına sistemli şəkildə töhfə verir. Hər il üzə çıxarılan onlarca istedadlı gəncin inkişaf üçün yeni perspektivlər qazanması proqramın strateji əhəmiyyətini bir daha ön plana çıxarır.
"Yüksəliş hekayəsi" rubrikası çərçivəsində bu dəfəki müsahibimiz III “Yüksəliş”müsabiqəsinin qaliblərindən biri olan Toğrul İslamdır. Həmin müsahibəni təqdim edirik:
— Sizin uğur yolunuzda “Yüksəliş” müsabiqəsinin rolu nə oldu və bu proses şəxsiyyətinizdə hansı əsas dönüş nöqtələrini yaratdı?
— İlk növbədə dəvətiniz və marağınız üçün təşəkkür edirəm. “Yüksəliş” mənim üçün sadəcə bir müsabiqə deyil, özümü daha yaxından tanımaq və inkişaf istiqamətlərimi müəyyənləşdirmək baxımından ciddi bir mərhələ oldu. Bu proses zamanı həm güclü tərəflərimi, həm də inkişaf etdirməli olduğum məqamları daha aydın gördüm. Real “case”lər üzərində işləmək və peşəkarlar tərəfindən qiymətləndirilmək mənə kənardan necə göründüyümü anlamağa imkan verdi. Bu yarış mənə öyrətdi ki, insan öz güclü tərəflərini daha da inkişaf etdirməli, zəif tərəflərini isə daim nəzarətdə saxlamalıdır. Mən də məhz bu yanaşmanı əsas götürərək həm şəxsi, həm də peşəkar inkişafım üzərində daha sistemli işləməyə başladım.
— Bu müsabiqədə iştirak edərkən qarşılaşdığınız ən çətin mərhələ hansı idi və siz bu çətinliyi hansı strategiya ilə aşdınız?
— Mənim üçün ən çətin mərhələlər yarımfinal və final etapları oldu. İlkin mərhələlərdə əsasən idarəetmə bacarıqları, məntiqi yanaşma, analitik düşüncə kimi istiqamətlər qiymətləndirilirdi. Müəyyən hazırlığı, dünyagörüşü və sistemli düşüncə tərzi olan iştirakçılar həmin mərhələləri uğurla keçə bilirdilər. Amma yarımfinal və final tamamilə fərqli bir atmosfer idi. Orada artıq yüksək potensiala malik iştirakçılarla birlikdə real situasiyalar üzərində işləyirsiniz. Saatlarla davam edən gərgin iş rejimi, komanda fəaliyyəti, stresin idarə olunması, “case”lərin təhlili və düzgün qərarvermə prosesi kifayət qədər yorucu idi. Bu çətinliyi isə əsasən düzgün zaman bölgüsü, komanda işi və emosional balansı qorumaq strategiyası ilə aşmağa çalışdım.
— Qələbənizi yalnız fərdi nailiyyət kimi deyil, həm də cəmiyyət üçün bir məsuliyyət kimi necə dəyərləndirirsiniz?
— Səmimi desəm, “Yüksəliş” mənim üçün bir yarışdan daha böyük məna daşıyır. Bu layihə dövlətin insan kapitalına yatırdığı ən mühüm investisiyalardan biridir. Layihənin əsas dəyərlərindən biri də vətənə və cəmiyyətə xidmətdir.
Bu səbəbdən düşünürəm ki, burada əldə olunan uğur təkcə şəxsi nailiyyət deyil, həm də müəyyən məsuliyyətdir. İndiyədək çalışdığım bütün sahələrdə cəmiyyətə və dövlətə fayda verməyə çalışmışam. Bundan sonra da fəaliyyətimdə bu məsuliyyət hissini əsas prinsip kimi qorumağı düşünürəm.
— Liderlik anlayışını sizin üçün fərqləndirən əsas xüsusiyyətlər hansılardır və bu xüsusiyyətləri real həyatda necə tətbiq edirsiniz?
— Mənim düşüncəmdə liderlik yalnız səlahiyyət sahibi olmaq demək deyil. Əsl lider komandasının həm yaxşı, həm də çətin günündə onların yanında olan insandır. Lider eyni zamanda komandasını motivasiya etməyi, insanların inkişafına dəstək olmağı və şəffaf idarəetmə qurmağı bacarmalıdır. Digər vacib məqam isə şəxsi maraqlardan daha çox sistemin ümumi faydasını düşünməkdir. Mən də çalışıram ki, fəaliyyətimdə qərarlar qəbul edərkən yalnız fərdi nəticələri deyil, ümumi sistemə verəcəyi töhfəni nəzərə alım.
— Gənclərə və gələcək iştirakçılara tövsiyə olaraq, bu müsabiqəyə hazırlaşarkən hansı bacarıqların inkişafını vacib hesab edirsiniz?
— Düşünürəm ki, burada ən vacib məsələlərdən biri komanda işi və kommunikasiya bacarıqlarıdır. İnsan öz fikrini aydın və düzgün formada ifadə etməyi bacarmalıdır. Eyni zamanda strateji və nəticəyönümlü düşüncə də olduqca önəmlidir. “Yüksəliş” yalnız nəzəri bilik üzərində qurulan yarış deyil. Burada daha çox düşüncə tərzi, dünya görüşü və əldə olunan biliklərin real praktikaya tətbiqi qiymətləndirilir. Buna görə də gənclər həm nəzəri biliklərini inkişaf etdirməli, həm də həmin bilikləri real situasiyalarda tətbiq etməyi öyrənməlidirlər.
— Sizcə, müasir dövrdə uğurlu lider olmaq üçün ən vacib keyfiyyətlər hansılardır və Azərbaycan reallığında bu keyfiyyətlər necə formalaşdırılmalıdır?
— Müasir dövrdə dünya çox sürətlə dəyişir və texnologiyalar hər gün yenilənir. Xüsusilə süni intellekt və rəqəmsallaşma dövründə liderlərin əsas vəzifələrindən biri bu dəyişiklikləri izləmək və onları idarəetmə proseslərinə tətbiq edə bilməkdir. Məncə, bu gün lider üçün ən vacib keyfiyyətlər proaktivlik, məsuliyyət və təşəbbüskarlıqdır. İnsan yalnız öz işinə deyil, ümumi sistemə təsiri düşünərək qərarlar verməlidir. Azərbaycan reallığında da məhz belə yanaşmaların inkişaf etdirilməsi daha çevik və effektiv idarəetmə modelinin formalaşmasına töhfə verə bilər.
— Gələcək planlarınız nədən ibarətdir və qazandığınız bu uğuru daha geniş ictimai faydaya necə çevirməyi düşünürsünüz?
— Hazırda maliyyə sahəsində fəaliyyət göstərirəm və gələcəkdə də bu istiqamətdə inkişaf etməyi planlaşdırıram. Xüsusilə idarəetmə və strateji qərarvermə sahəsində daha aktiv rol almaq, çalışdığım qurumların inkişafına töhfə vermək əsas məqsədlərimdən biridir. Bununla yanaşı, mentorluq fəaliyyətinə də xüsusi önəm verirəm. Gənclərlə işləməyi çox sevirəm və düşünürəm ki, qazandığımız bilik və təcrübəni paylaşmaq vacibdir. Bu səbəbdən müxtəlif görüşlər, mentorluq proqramları və maarifləndirici fəaliyyətlərlə gənclərin inkişafına dəstək olmağa çalışıram.
— Sonda yeni iştirakçılara bir sözlə nə demək istəyirsiniz?
— Öz potensiallarına inanmaqdan və yeni addımlar atmaqdan çəkinməsinlər. Bəzən insanın atdığı kiçik, amma cəsarətli bir addım gələcəkdə çox böyük uğurların və yeni imkanların başlanğıc nöqtəsinə çevrilir.
Elmir Heydərli
19:20 22.05.2026
Oxunuş sayı: 54
