Dünyanın ən təhlükəli bitkisi – ona toxunmaq belə ölümlə nəticələnə bilər!
Təbiət hər zaman gözəllikləri ilə bizi valeh etsə də, bəzən ən saf görünüşlü bitkilər belə ölümcül təhlükə mənbəyinə çevrilə bilir. Elm adamları xəbərdarlıq edir: Dendrocnide moroides və ya xalq arasında tanınan adı ilə Gimpi-Gimpi dünyanın ən təhlükəli bitkisi hesab olunur.
Bu bitki ilə təmas etmək nəinki sağlamlığınız, hətta həyatınız üçün ciddi risk yaradır.
Gəlin, bu ölümcül bitkiyə birlikdə nəzər salaq.
Avstraliyanın tropik meşələrində və İndoneziyanın bəzi hissələrində rast gəlinən bu bitki, geniş ürəkvari yarpaqları ilə ilk baxışdan zərərsiz bir kolu xatırladır. Lakin onun bütün səthi gözlə görünməyəcək qədər kiçik, silisium tərkibli iynələrlə örtülüdür. Yarpaqlara toxunduğunuz an iynələr dəriyə batır və bədənə güclü neyrotoksin yeridir. Bu ağrını insanlar "eyni anda həm qaynar turşu ilə yanmaq, həm də elektrik cərəyanına tuş gəlmək" kimi təsvir edirlər.
Əgər iynələr dəridən tamamilə çıxarılmazsa, ağrı həftələr, aylar, hətta illər yenidən qayıda bilər.
Bitkinin yaxınlığında durmaq belə risklidir. Yarpaqlardan havaya uçan kiçik tüklər tənəffüs yollarına düşərsə, asqırma, burun qanaması və nəfəs darlığına səbəb olur.
Tarixi qeydlərdə bu bitkinin yaratdığı ağrıya dözə bilməyib intihar edən insanların və tələf olan heyvanların hekayələri mövcuddur. Hətta İkinci Dünya Müharibəsi zamanı bəzi əsgərlərin bu bitki ilə təmasdan sonra dözülməz əzablar çəkdiyi bildirilir.
Təbiətin bu ölümcül bitkisi bizə bir şeyi xatırladır: Hər yaşıl görünən bitki dost deyil! Ekzotik ölkələrə səyahət edərkən ətrafınızdakı bitki örtüyünə qarşı maksimum diqqətli olunmalıdır.Əks halda həyatınız üçün böyük risk yaratmış olarsınız.
Validə Musayeva
18:33 19.05.2026
Oxunuş sayı: 47
