Yaz istisi pişiklər üçün risk yaradır: Mütəxəssislər xəbərdarlıq edir
Yay aylarının yaxınlaşması ilə havaların kəskin istiləşməsi ev heyvanlarının sağlamlığına ciddi təsir göstərir. Pişiklər ümumilikdə istiliyi müəyyən qədər sevsələr də, yüksək temperatur və xüsusilə rütubət onların orqanizmi üçün risk yarada bilər. Bu səbəbdən yay aylarında pişiklərə xüsusi qulluq göstərilməsi vacib hesab olunur.
İstilik pişiklərə necə təsir edir?
Havanın həddindən artıq isti olması və uzun müddət günəş altında qalma pişiklərdə istilik stressi və istilik vurması riskini artırır. Pişiklərin orqanizmi insanlarda olduğu kimi effektiv soyuma mexanizminə malik olmadığından, yüksək temperatur zamanı bədən istiliyini tənzimləməkdə çətinlik çəkirlər. Bu isə ciddi sağlamlıq problemlərinə, hətta həyati təhlükəyə səbəb ola bilər.
Xüsusilə bağlı mühitdə, balkonda və ya açıq sahədə uzun müddət qalan pişiklər bu risklə daha çox üz-üzə qalırlar.
İstilik vurmasının əlamətləri
Mütəxəssislərin məlumatına görə, pişiklərdə istilik vurması zamanı aşağıdakı əlamətlər müşahidə oluna bilər:
Güclü halsızlıq və hərəkətsizlik
Sürətli və çətin nəfəsalma
Ağız və dilin qızarması
Həddindən artıq qaytarna
Qusma və iştahsızlıq
Əzələ seğirmələri
Qeyri-adi davranış və narahatlıq
Bədən temperaturunun 40°C-dən yuxarı qalxması
Huşun itməsi və koordinasiya pozğunluğu
Bu əlamətlər ciddi vəziyyətin göstəricisi hesab olunur və dərhal baytarlıq müdaxiləsi tələb edir. Gecikmə orqan zədələnməsinə və hətta ölümə səbəb ola bilər.
Risk qrupuna daxil olan pişiklər
Bəzi pişiklər istiliyə daha həssasdır və daha yüksək risk altındadır:
Yaşlı pişiklər
Artıq çəkisi olanlar
Ürək və tənəffüs xəstəliklərindən əziyyət çəkənlər
Uzun və qalın tüklü cinslər
Fiziki aktivliyi yüksək olan pişiklər
Nöroloji problemləri olan heyvanlar
İstilikdən qorunma yolları
Mütəxəssislər yay aylarında pişiklərin sağlamlığını qorumaq üçün bir sıra tədbirləri tövsiyə edir:
Pişiyin daim təmiz və sərin suya çıxışı olmalıdır
Su mütəmadi olaraq dəyişdirilməli və sərin saxlanılmalıdır
Yaş mama istifadəsi artırılmalıdır
Yaşayış sahəsi kölgəli və havadar olmalıdır
Günün ən isti saatlarında oyun və aktivlik azaldılmalıdır
Pişiyin bədəni lazım olduqda nəm parça ilə sərinlədilə bilər
Birbaşa günəş altında qalmasının qarşısı alınmalıdır.
Qeyd edək ki, istilik vurması şübhəsi yarandıqda pişik dərhal sərin və kölgəli yerə aparılmalı, bədəni tədricən soyudulmalıdır. Lakin buzun birbaşa tətbiqi məsləhət görülmür, çünki bu, şok riskini artıra bilər. Daha sonra vaxt itirmədən baytarlıq xidmətinə müraciət edilməlidir.
Həmçinin bildirək ki, yay aylarında düzgün qulluq və diqqət pişiklərin həyatını xilas edə və onların sağlamlığını qoruyaraq təhlükələrin qarşısını ala bilər.
Fatimə Məmmədova
06:02 10.05.2026
Oxunuş sayı: 54
