Gündəm

Barəsində çox şey məlum olan, həm də heç nə məlum olmayan dahi

21 il öncə kimi itirdiyimizin fərqində olmayan ağzıgöyçəklərə xatırlatma

Bu yazıya Farabinin bir fikri ilə başlamaq istəyirəm: “Əgər bir dahi ölərsə, ona ağlamayın, onu itirən xalqa ağlayın”.
İkinci bir sitatdan da istifadə etmək yerinə düşər. Türkiyə Respublikasının sabiq Baş naziri Bülənt Ecevit demişdi: “Heydər Əlirza oğlu min ildən bir doğulan dahilərdəndir. O, həyatda Atatürkdür”.
Güman edirəm ki, bu iki fikirdən qədirbilən xalqımız 21 il öncə dekabrın 12-də kimi itirdiyimizi aydın başa düşdü. Ancaq bir halda ki, böyük şəxsiyyətə kölgə salmaq istəyən bəzi ağzıgöyçəklər var, onlara ünvanlanmış bəzi fikirlərimi ziyalı olaraq söyləmək istəyirəm. Həm də, fikrimcə, bu, hər bir ziyalıların milli borcudur.
Beləliklə, biz kimi itirmişik?
Heydər Əliyev tarixi şəxsiyyətdir. Çünki müasir Azərbaycan dövlətinin banisi və qurucusudur. Corc Vaşinqton Amerika Birləşmiş Ştatları, Adenaur Almaniya, Atatürk Türkiyə üçün kimdirsə, Heydər Əliyev bizim üçün odur.
Heydər Əliyev dahidir. Bəs, dahi kimə deyilir? Dahi siyasi və milli dövlətçilik fəlsəfəsinin, milli ideologiyanın, müdrik kəlamların müəllifidir. Heydər Əliyevin dediyi fəlsəfi fikirlər həm keçmişimiz, həm bu günümüz, həm də gələcəyimiz üçün doğrudur. O, böyük filosof idi. Heydər Əliyevin dəyərli aforizmləri 500-dən çoxdur. Onun fikirləri zaman və məkana sığmır. Bizim üçün doğru olan fikirləri qonşu dövlətlər üçün də doğrudur.
Heydər Əliyev fövqəlbəşərdir. Birinci dəfə onu hakimiyyətə gətirən imperiya, ikinci dəfə onun hakimiyyətə gəlməsini qətiyyətlə istəmirdi. Ancaq o, hakimiyyətə gözlənildiyindən daha tez gəldi.
Heydər Əliyev planetar düşüncəli rəhbər idi. O, iki dəfə Azərbaycanda hakimiyyətdə olub. Hakimiyyətinin birinci dönəmində (kommunist dövrü) qurucu rəhbər, ikinci mərhələsində (müstəqil və demokratik) müdrik filosof-prezident kimi fəaliyyət göstərib.
Heydər Əliyev sanki yer adamı deyildi və bizlərdən fərqli bir ömür yaşadı. Onun həyatı övliyaların, peyğəmbərlərin həyat tərzinə bənzəyir. Bakıda ikinci Bakını tikdi, ancaq özünə 2 gözlu otaq götürmədi. Övladlarına sadədən sadə toy etdi.
Heydər Əliyev ictimai mənafe daşıyıcısı idi. Bu işıqlı dünyaya şəxsi mənafe ilə gəlmişdi. Bu işıqlı dünyadan ictimai mənafe daşıyıcısi kimi köçdü.
Qısaca bu qədər. Ancaq min ildən bir doğulan dahi olan Heydər Əliyev haqqında az bilirik. Onu dəqiq tanısaydıq, indi onun irsinə müxalif bir nəfər belə olmazdı. Əgər varsa, deməli, biz Heydər Babanı hələ yaxşı tanımırıq. Bu səpkidə ən dəyərli fikri Mixayl Serdyukov deyib: “Onun barəsində çox şey məlumdur, həm də heç nə məlum deyil”.