Ermənistan Konstitusiyası dəyişdirilməlidir – Azərbaycanın sərt və haqlı tələbi
Ermənistanın Azərbaycana qarşı ərazi iddialarını özündə ehtiva edən Konstitusiyası uzun illərdir regionda sülhün və sabitliyin təmin olunması istiqamətində ciddi maneələrdən biri kimi qiymətləndirilir. Bu məsələ beynəlxalq ictimaiyyətin diqqət mərkəzində olmaqla yanaşı, Azərbaycanın da narahatlığına səbəb olur.
Mövzu ilə bağlı Crossmedia.az-a açıqlama verən politoloq Yalçın Hacızadə bildirib ki, “Azərbaycan 2020-ci ildə 44 günlük müharibədə əldə etdiyi qələbədən sonra dərhal sülh planlarını Ermənistana təqdim etdi və danışıqların ikitərəfli aparılmasının daha yaxşı nəticələr verəcəyini bildirdi. Lakin rəsmi İrəvan vasitəçi ölkələrin bölgə ilə maraqlarına söykənərək separatizmi yenidən dirçəltməyə, sülh danışıqları ilə bağlı qeyri-səmimi davranmağa davam edirdi. Azərbaycana təsir etmək istəyən ölkələrə Bakının verdiyi cavablar və 2023-cü ilin sentyabrında keçirilən bir günlük antiterror əməliyyatı Ermənistanın separatizmlə bağlı planlarını məhv etdi. Nəticə olaraq da Ermənistan ikitərəfli danışıqlar şərti ilə razılaşmalı oldu. Ermənistanın ikitərəfli danışıqlar istiqamətində razılıq verməsi irəliləyiş hesab edilsə də, bu, səmimiyyətdən deyil, Azərbaycanın sülhə məcburetmə tədbirləri nəticəsində yaranıb”.
Onun sözlərinə görə, “hal-hazırda Ermənistanla danışıqlarda bir çox məsələlər üzrə razılıq əldə olunsa da, əsas şərtimiz olan Ermənistan Konstitusiyasının dəyişdirilməsi məsələsi açıq qalır. Hesab edirəm ki, Paşinyan daxili təzyiqlərdən çəkinərək bu şərti qəbul etməkdən yayınır.
Əlbəttə, ölkəmizin xarici siyasəti geniş vektorludur. Ona görə demək olmaz ki, bizim əsas işimiz və məqsədimiz Ermənistanla sülh razılaşmasının əldə olunmasına yönəlib. Qələbədən sonra biz qardaş Türkiyə ilə, böyük iqtisadi imkanlara malik olan Çinlə və bir çox Avropa ölkələri ilə “Strateji tərəfdaşlıq” haqqında müqavilələr bağlamışıq. Yəni biz bütün gözümüzü və ümidimizi Ermənistanla sülh müqaviləsinin bağlanmasına dikməmişik. Sadəcə olaraq “Sülh razlaşmasının əldə olunmasında ölkəmizin məqsədi əldə etdiyi qələbənin rəsmiləşdirilməsi və sonra regionla bağlı beynəlxalq planlarının şaxəli şəkildə həyata keçirməsidir. Burda da əsas beynəlxalq plan Zəngəzur dəhlizidir”.
“Görünən odur ki, Ermənistan daxili və xarici təzyiqlərə görə sülh razılaşmasının bağlanmasından yayınır. Hesab edirəm ki, Ermənistan nə qədər bizlə sülh razılaşmasının əldə edilməsini, qardaş Türkiyə ilə münasibətlərini bərpa etməsini gecikdirərsə özü itirəcək. Yəni dünyada artıq siyasi şərait, şərtlər tez-tez dəyişir. Ona görə bir müddətdən sonra bizim şərtlər Ermənistan üçün daha ağır ola bilər”,- deyə politoloq qeyd edib.
Fidan Hacızadə
07:03 13.12.2024
Oxunuş sayı: 12863
