Hadisə

“Beynəlxalq Şeflər Liqası”nın möhtəşəm qala gecəsi və mükafatlandırma mərasimi keçirilib

Bu gün Bakıda kulinariya dünyasının ən nüfuzlu hadisələrindən biri olan “Beynəlxalq Şeflər Liqası”nın (International Chefs League) möhtəşəm qala gecəsi və mükafatlandırma mərasimi keçirilib. Tədbir, müxtəlif ölkələrdən gələn usta şefləri və sahənin aparıcı mütəxəssislərini bir araya gətirərək əsl qastronomiya bayramına çevrilib.

Tədbirin açılışında Azərbaycanın beynəlxalq tədbirlərə ev sahibliyi etmək ənənəsinin əhəmiyyəti vurğulanıb. “Beynəlxalq Şeflər Liqası” sadəcə bir yarışma deyil, həm də Türkiyə, Rusiya, Dağıstan, Qazaxıstan kimi ölkələrin kulinariya ustaları arasında təcrübə mübadiləsi və dostluq körpüsü rolunu oynayan xüsusi bir platforma kimi qiymətləndirilib.

Tədbirin ideya müəllifi və əsas təşkilatçısı, “Hilal Star” mükafatı laureatı Ali Magerro səhnəyə dəvət olunaraq, rəhbərlik etdiyi “Beynəlxalq Şeflər Liqası Assosiasiyası”nın qastronomiyanın inkişafındakı rolundan bəhs edib.

Təşkilatçı, Qida Təhlükəsizliyi Hərəkatının rəhbəri, sağlam qidalanma mütəxəssisi, Məhsəti Hüseynova, qida mühəndisi Asim Vəliyev, fəxri qonaq Azərbaycan Milli Kulinariya Assosiasiyasının prezidenti Tahir Əmiraslanov, peşəkar aşbaz Xəqani Məmmədov, Ümumdünya Aşbaşazlar Dərnəyinin vitse prezidenti Sait Önder, Beynəlxalq Şeflər Assosiasiyasının nümayəndəsi Röyal Baxşıyev və digər fəxri qonaqlar milli mətbəximizin beynəlxalq səviyyədə tanıdılması və sağlam qidalanma mədəniyyətinin formalaşması istiqamətindəki fəaliyyətlərinə görə alqışlarla qarşılanıblar.

Mərasimdə iştirak edən Peşə Təhsili üzrə Dövlət Agentliyinin nümayəndəsi Aytən Səfərəliyeva gənclərin peşə yönümlü inkişafının vacibliyinə toxunub.

Gecənin ən həyəcanlı məqamı müxtəlif titular üzrə qonaqların təltifi olub. Təltiflət kulinariya sahəsindəki fərqli pillələri əhatə edib. Onlar “Daimi Fəxri Üzv və Jüri”, “Executive Chef”, “Master Chef”, “Young Chef” dərəcləri üzrə müxtəlif diplom və vəsiqələrlə təltif olunublar. Təltif olunanlar arasında Dağıstanın elmlər doktoru Maxaç Vaqabov, kulinariya üzrə mütəxəsis Xumsat Mirzayeva, Türkiyədən “WICS” vitse prezidenti Sait Önder, tanınmış şeflər Yunus Emre, Ercan Çinar, İsmail Özkan, Azərbaycandan tanınmış şeflər Ruslan Hüseynov, Amid Mirzəyev, Eynur Nağdəliyev, Günel Məmmədli, Aylin Məmmədli, Ağakərim Şahmidzadə, Cərulla Cərullazadə və onlarla peşəkar abşaz tətlif olunublar.

🖨 Çap et

10:39 21.04.2026

Oxunuş sayı: 67