Bakı Dövlət Universitetində “Zəfərə aparan yol: Aprel döyüşləri” mövzusunda tədbir keçirilib
“Şəhərsalma və Memarlıq İli” çərçivəsində YAP Yasamal rayon təşkilatı və BDU “YENİ Klub”un birgə təşkilatçılığı ilə “Zəfərə aparan yol: Aprel döyüşləri” adlı tədbir keçirilib. Tədbirdə YAP Yasamal rayon təşkilatının sədri Bəxtiyar Nəbiyev, Azərbaycan Respublikası Milli Məclisinin deputatı Göydəniz Qəhrəmanov, BDU “YENİ Klub”un sədri Asif Əliyev, BDU-nun Humanitar məsələlər və gənclər siyasəti şöbəsinin müdiri Ramin Səmədov, BDU-nun Heydər Əliyev Muzeyinin mütəxəssisi Afət Seyidbəyova, Yasamal Rayon İcra Hakimiyyətinin Vətən müharibəsi iştirakçıları və şəhid ailələri ilə işin təşkili şöbəsinin müdiri, Vətən müharibəsi iştirakçısı Samir İsmiyev, Vətən müharibəsi iştirakçısı, Ekologiya və Təbii Sərvətlər Nazirliyinin sektor müdiri, ərazi partiya təşkilatının sədri Amil Sefiyev, Aprel döyüşləri və 44 günlük Vətən müharibəsi qazisi Cümşüd Hüseynov, BDU-nun “YENİ Klub”nun üzvləri və tələbələr iştirak edib.
BDU-nun Heydər Əliyev muzeyində keçirilən tədbirdə ilk öncə Ulu Öndər Heydər Əliyevin, Azərbaycanın ərazi bütövlüyü və suverenliyi uğrunda canlarını qurban vermiş şəhidlərin əziz xatirəsi bir dəqiqəlik sükutla yad edilib. Sonra Azərbaycan Respublikasının Dövlət Himni səsləndirilib.
Çıxış edən YAP Yasamal rayon təşkilatının sədri Bəxtiyar Nəbiyev qeyd edib ki, 2016-cı ilin Aprel döyüşlərindən 10 il ötür və bu tarix dünyada Azərbaycan dövlətinin gücünün real ifadəsi kimi yadda qalıb. Bu qələbənin ideoloji təməli Ulu Öndər Heydər Əliyev tərəfindən müəyyən edilmiş dövlətçilik strategiyasına söykənir. Onun əsasını qoyduğu ordu quruculuğu siyasəti müasir və güclü Silahlı Qüvvələrin formalaşmasını təmin etdi. Bu xətt Prezident, Müzəffər Ali Baş Komandan cənab İlham Əliyev tərəfindən qətiyyətlə davam etdirildi. Aprel döyüşləri bu siyasətin ilk böyük uğurlu sınağı oldu. Ordumuzun qətiyyəti və peşəkarlığı düşmənə ciddi zərbə vurdu. Nəticədə Şanlı Azərbaycan Ordusu Füzuli, Cəbrayıl və Ağdərə rayonlarının işğal altındakı ərazilərinin 2000 hektardan çox hissəsini azad etdi, həmçinin Lələtəpə yüksəkliyi, Cəbrayıl rayonunun Cocuq Mərcanlı kəndi Ordumuzun tam nəzarətinə keçdi. Qeyd olunub ki, Aprel zəfəri 2020-ci il Vətən müharibəsinin başlanğıc nöqtəsinə çevrildi. Həmin müharibədə Azərbaycan tarixi Qələbə qazandı. Daha sonra 2023-cü ildə həyata keçirilən lokal xarakterli antiterror tədbirləri dövlət suverenliyini tam bərpa etdi. Bununla da ölkəmizin ərazi bütövlüyü tam təmin olundu və Konstitusiyamızın hüquqi qüvvəsi ölkənin bütün ərazilərində bərqərar oldu. Bu şanlı tarix eyni zamanda gənclər arasında vətənpərvərlik ruhunun güclənməsinə güclü təkan verdi. Şəhidlərimizin qəhrəmanlığı və ordumuzun rəşadəti cəmiyyətimizdə birlik və həmrəyliyin möhkəmlənməsinin parlaq nümunəsinə çevrildi.
Azərbaycan Respublikası Milli Məclisinin deputatı Göydəniz Qəhrəmanov çıxış edərək bildirib ki, Aprel döyüşlərindən keçən 10 il Azərbaycanın geosiyasi və hərbi gücünün ardıcıl inkişafını açıq şəkildə göstərir. Aprel döyüşləri həm də Azərbaycan cəmiyyətində milli həmrəyliyin və dövlətçilik ideologiyasının güclənməsinə mühüm təsir göstərdi. Bunun da təməlində Ulu Öndər Heydər Əliyevin müəyyən etdiyi milli təhlükəsizlik strategiyası dayanır. Ümummilli Liderin yaratdığı güclü dövlət modeli gələcək qələbələrin əsasını qoydu. Prezident İlham Əliyev bu modeli daha da inkişaf etdirərək müasir hərbi gücə çevirdi. Aprel döyüşləri Azərbaycanın öz sözünü güc yolu ilə də deyə biləcəyini nümayiş etdirdi. Ermənistanın hərbi mifləri məhz bu döyüşlərdə dağıldı. Bu hadisə regionda yeni reallıqların formalaşmasına səbəb oldu. Şəhidlərin, qazilərin və müharibə iştirakçılarının qəhrəmanlığı milli yaddaşda əbədi yer tutdu. Bu döyüşlər gənc nəslin vətənpərvərlik ruhunda tərbiyəsinə də güclü təsir göstərdi. Bildirilib ki, 2020-ci ildə əldə olunan Zəfər bu prosesin kulminasiya nöqtəsi oldu. Azərbaycan öz torpaqlarını işğaldan azad etdi. Sonrakı mərhələdə həyata keçirilən lokal antiterror tədbirləri separatizmin kökünü tam kəsdi. Beləliklə, dövlət suverenliyi tam bərpa olundu. Nəticədə konstitusion hüquq və dövlət idarəçiliyi ölkənin bütün ərazilərində təmin edildi. Bu gün Aprel döyüşləri milli qürurun və tam Zəfərin başlanğıcı kimi şanlı tariximizdə özünə layiqli yerini tutur.
Ekologiya və Təbii Sərvətlər Nazirliyinin sektor müdiri, ərazi partiya təşkilatının sədri Amil Sefiyev, Yasamal Rayon İcra Hakimiyyətinin Vətən müharibəsi iştirakçıları və şəhid ailələri ilə işin təşkili şöbəsinin müdiri, Vətən müharibəsi iştirakçısı Samir İsmiyev, Aprel döyüşləri və 44 günlük Vətən müharibəsi qazisi Cümşüd Hüseynov və BDU-nun Heydər Əliyev Muzeyinin mütəxəssisi Afət Seyidbəyova çıxışlarında bildiriblər ki, Aprel döyüşləri Azərbaycan ordusunun modernləşmə siyasətinin uğurla həyata keçirildiyini sübut edən mühüm hadisə idi. Bu siyasətin əsası Ulu Öndər Heydər Əliyev tərəfindən qoyulmuşdu. Onun dövründə nizami ordu quruculuğu prioritet istiqamətə çevrildi. Prezident, Müzəffər Ali Baş Komandan İlham Əliyev bu prosesi yeni mərhələyə yüksəltdi. Müasir texnologiyalar və peşəkar kadr hazırlığı ordunun gücünü artırdı. Aprel döyüşlərində bu güc öz real təsdiqini tapdı. Qısa müddətdə əldə edilən uğurlar strateji üstünlük yaratdı. Bu təcrübə 2020-ci il Vətən müharibəsində geniş tətbiq olundu. Nəticədə Azərbaycan parlaq Zəfər qazandı. Ardınca keçirilən lokal xarakterli antiterror əməliyyatları ilə bütün qeyri-qanuni silahlı birləşmələr zərərsizləşdirildi. Bununla da ərazi bütövlüyü və suverenlik tam təmin edildi. Bu gün dövlətin konstitusion hüquqları ölkənin hər qarışında bərqərar olub. Çıxışlarda şəhid və qazilərimizin göstərdikləri igidlik və şücaət nümunələri xüsusi vurğulanıb, onların vətənpərvərlik ruhunun gənc nəsil üçün örnək olduğu bildirilib.
Çıxışlardan sonra tələbələrin çoxsaylı sualları cavablandırılıb, xatirə şəkli çəkdirilib.
12:36 02.04.2026
Oxunuş sayı: 74
