Azərbaycan İrana humanitar yardım göndərdi: "Soyuq küləklər" aradan qalxır?
Azərbaycanın İrana humanitar yardım göndərməsi, regional gərginlik fonunda dövlətin prinsipial və humanist mövqeyini nümayiş etdirən mühüm addımdır. Məlum olduğu kimi, bir neçə gün əvvəl Naxçıvana düşən raketin İrandan gəldiyi iddiası diplomatik münasibətləri müəyyən qədər gərginləşdirmişdi. Belə bir vəziyyətdə Azərbaycanın humanitar yardım göndərməsi, sadəcə qonşuluq məsuliyyətinin icrası deyil, eyni zamanda ölkənin regional siyasətdə humanist dəyərlərə və etik prinsiplərə sadiqliyinin ifadəsidir. Bu addım həm də bölgədə qarşılıqlı anlaşma və əməkdaşlığın qorunmasına xidmət edən bir mesajdır. Azərbaycan yalnız güc siyasəti ilə deyil, humanitar və diplomatik vasitələrlə də bölgədə sülh və sabitliyin təmin olunmasına töhfə verir.
Azərbaycanın İrana humanitar dəstəyi barədə Milli Məclisin deputatı Vüqar İsgəndərov Crossmedia.az-a açıqlama verib:
"Azərbaycan güclü dövlət olaraq həm də humanist dəyərlərə böyük önəm verən ölkədir. Biz bilirik ki, adətən güclü dövlətlər həm də siyasi mədəniyyət nümayiş etdirə bilirlər. Humanizm zəiflik deyil, əksinə, güclü dövlətlərin siyasi mədəniyyətidir və Azərbaycan bunu çətin dövrlərdə həmişə nümayiş etdirib. Biz münaqişə yaşamışıq, ölkə olaraq bu münaqişə içində olmağa baxmayaraq, humanitar məsələlərə həmişə çox diqqət etmişik. Bu, Azərbaycanın davranışını da ortaya qoyur. Azərbaycanın İrana humanitar dəstək göstərməsi, yardım etməsi həmin dəyərlərə verdiyi böyük önəmi əks etdirir. Biz regionda yalnız güc siyasəti aparan dövlət deyilik, həm də humanitar məsələləri daşıyan bir dövlətik. Biz yalnız İranla bağlı deyil, zaman-zaman Ukraynaya, Suriyaya, yaxın Şərqə, Afrika ölkələrinə, qardaş Türkiyəyə meşə yanğınlarında, zəlzələlərdə və digər fəlakətlərdə də humanitar mövqe nümayiş etdirmişik. Yəni dövlətimiz bütün məsələlərdə həmişə humanist mövqe nümayiş etdirib. Ölkəmizin İrana humanitar yardım göstərməsini belə izah etmək olar".
Deputat əlavə edib ki, İranla olan münasibətlərdə təbii ki, bəzən anlaşılmazlıqlar baş verir: "Bu baxımdan İran Prezidenti Məsud Pezeşkianın Azərbaycan dövlət başçısı İlham Əliyevə zəng etməsi və iki ölkə başçısının atılan raketlərlə bağlı məsələni müzakirə etməsi, həmçinin Pezeşkianın rəsmi Tehranın mövqeyini çatdırması önəmlidir. Hazırda bölgədə baş verən bu eskalasiyanın artıq 12 günü geridə qalıb. Müharibə qan və ölüm gətirir; günahsız insanların həyatını alır, yaralanmalara səbəb olur və infrastrukturu dağıdır. Bu, həm siyasi, həm iqtisadi, həm də humanitar fəlakətlər yaradır. Bu baxımdan biz yaxın qonşu olaraq, bölgədə belə hadisələrin baş verməsini istəmirik. Rəsmi Bakı tərəfləri, həm ABŞ-ni, həm İsraili, həm də İranı masaya oturmağa dəvət edib. Biz 30 ilə yaxın münaqişə şəraitində olmuşuq və bu müharibədə qalib gəlmişik, suverenliyimizi bərpa etmişik, yəni münaqişənin nə olduğunu, bəlkə, hamından yaxşı bilirik. Ona görə də bölgəmizdə, qonşuluğumuzda yalnız sülhün, inkişafın və tərəqqinin olmasında maraqlıyıq. Hər hansı problemlərin və incidentlərin baş verməsinə baxmayaraq, rəsmi Bakı humanist dəyərlərə nə qədər sadiq olduğunu daim nümayiş etdirir".
Ayhan
14:34 12.03.2026
Oxunuş sayı: 53
