Qərbi Azərbaycana qayıdış və tarixi çağırışlar

Qərbi Azərbaycan problemi Azərbaycan xalqı üçün yalnız tarixə aid bir məsələ deyil, bu gün də aktual milli məsələdir. Məcburi köçkün salınmış soydaşlarımızın öz ata-baba yurdlarına qayıtmaq hüququ, insan haqları və ədalətin bərpası istiqamətində görülən işlər beynəlxalq ictimaiyyətin diqqətini cəlb edir.

Bu çərçivədə Milli Məclisin deputatı Tənzilə Rüstəmxanlının Crossmedia.az-a olan açıqlamasına əsasən, yüksək səviyyədə təşkil olunmuş beynəlxalq konfrans Qərbi Azərbaycan məsələsini beynəlxalq arenaya çıxarmaq baxımından mühüm addım olub. Deputat konfransı Azərbaycanın milli maraqları və tariximizin ədalətli şəkildə dünyaya çatdırılması istiqamətində atılmış vacib bir addım kimi qiymətləndirib.

Konfransda dünyanın 16 ölkəsindən hüquq müdafiəçiləri, tarixçilər, tədqiqatçılar, alimlər və siyasətçilər iştirak edib. Ümumilikdə, 25 iştirakçı çıxış edərək Qərbi Azərbaycanla bağlı müxtəlif mövzuları müzakirə edib. Tədbir 5 paneldən ibarət olub və əsas diqqət Qərbi Azərbaycandan zorla çıxarılmış insanların hüquqlarının bərpasına yönəlib.

Xüsusilə insan hüquqları ilə bağlı çıxış edənlər sırasında İspaniya və ABŞ-dan qadın hüquq müdafiəçiləri, Türkiyə və Pakistandan nümayəndələr seçilib. Türkiyədən geniş bir heyətin iştirak etməsi bu məsələnin Türk dünyası üçün əhəmiyyətini bir daha vurğulayıb. Xarici qonaqların çıxışlarında Qərbi Azərbaycandan olan soydaşlarımızın öz yurdlarına qayıtmaq hüququ dəfələrlə qeyd edilib. Deputat Tənzilə Rüstəmxanlı bildirib ki, tədbir mövzuya qlobal yanaşmanı təmin edərək, həm hüquqi, həm də mənəvi məsələlərin əhəmiyyətini ortaya qoyub.

Tədbirin əhəmiyyəti yalnız müzakirə olunan mövzularla məhdudlaşmayıb. Deputat Tənzilə Rüstəmxanlı qeyd edib ki, konfrans Qərbi Azərbaycan məsələsinin beynəlxalq ictimaiyyətin gündəmində möhkəmlənməsi baxımından strateji rol oynayıb. Təklif olunub ki, bu mövzu gələcəkdə Avropa ölkələrinin parlamentlərində müzakirəyə çıxarılsın, çünki indiyə qədər ermənilər Avropada öz mövqelərini birtərəfli şəkildə tanıtdırmağa nail olublar. Onların hüquqlarının müdafiəsi ön planda olsa da, Qərbi Azərbaycandan zorla çıxarılmış insanların hüquqları diqqətdən kənarda qalıb. Deputat vurğulayıb ki, bu balanssızlığın aradan qaldırılması üçün ardıcıl addımlar atılmalıdır.

Tənzilə Rüstəmxanlı bildirib ki, bu beynəlxalq konfranslar davamlı olaraq keçirilməlidir və gələcəkdə Türkiyə, Türk dünyası və Avropa ölkələrində təşkil olunmalıdır. O qeyd edib ki, hər il ən azı bir neçə belə yüksək səviyyəli tədbir keçirilərək Qərbi Azərbaycan məsələsi beynəlxalq ictimaiyyətin diqqət mərkəzində saxlanılmalıdır. Bu konfransların əsas məqsədi Qərbi Azərbaycandan köçürülmüş insanların hüquqlarını qorumaqla yanaşı, bu məsələnin dünya parlamentlərinin və təşkilatlarının müzakirəsinə çıxarılmasıdır.

Konfrans Qərbi Azərbaycan məsələsinin Azərbaycanın milli prioriteti olaraq beynəlxalq ictimaiyyətin gündəmində möhkəmlənməsi istiqamətində əhəmiyyətli addım kimi qiymətləndirilib. Prezident İlham Əliyevin Qərbi Azərbaycan İcmasının yaradılması və bu məsələyə xüsusi diqqət ayırması, məcburi köçkünlərin hüquqlarının qorunması üçün əlverişli şərait yaradıb. Tənzilə Rüstəmxanlı konfransın yüksək təşkilatçılığını vurğulayaraq, bu səviyyənin gələcək tədbirlərdə də qorunmasının vacibliyini qeyd edib. Bu mövzu təkcə Azərbaycan üçün deyil, beynəlxalq insan haqları mübarizəsi baxımından da mühüm əhəmiyyət kəsb edir.

Nihat Tahirov