Gənclər niyə evlənmək istəmir?
Müasir cəmiyyətin sürətli inkişafı, texnologiyanın həyatımızın hər sahəsinə nüfuz etməsi və sosial medianın təsiri gənclərin ailə qurmaq anlayışına da müdaxilə edir. Bəzi oğlanlar bildirirlər ki, artıq tərbiyəli, namuslu və ailə dəyərlərinə sadiq qız tapmaq getdikcə çətinləşir. Onların fikrincə, günümüzdə bir çox qızların diqqətini daha çox maliyyə baxımından sabit, varlı ailələrə ərə getmək marağı formalaşdırır. Bu isə yalnız fərdi münasibətlərdə deyil, həm də ümumilikdə cəmiyyətin dəyərlərində dəyişikliklər yaradır.
Bu barədə psixoloq Aysu Həsənova Crossmedia.az-a fikirlərini bildirib:
"Belə fikirlər dərin qatlarında olan narahatlığın səthə çıxmış formasıdır və belə sözlər adətən təkcə qızlar haqqında deyil, münasibətlərə dair ümumi qorxu və gözləntilərin ifadəsi olur. Son illərdə münasibət qurmaq, ailə qurmaz məsələsində həm oğlanların, həm də qızların seçim meyarları dəyişib. Çünki sosial şəbəkələr, müqayisə mədəniyyəti və ideal obraz axtarışı insanların real insanı deyil, təsəvvür etdikləri obrazı axtarmasına səbəb olur.
“Tərbiyəli qız tapmaq çətindir” fikri çox vaxt konkret reallıqdan yox, ideal standartdan qaynaqlanır; yəni problem seçim imkanının azlığından deyil, gözləntinin həddindən artıq yüksəlməsindən doğur.
İnsan beyni seçim çox olanda qərarsızlaşır və bu zaman məsuliyyəti öz üzərindən atmaq üçün səbəbi qarşı tərəfdə görməyə meylli olur.
Digər tərəfdən, bəzi oğlanlarda ailə qurmaq qorxusu şüuraltı səviyyədə mövcud olur və bu qorxu özünü “uyğun insan tapılmır” düşüncəsi ilə maskalayır, çünki bu fikir həm sosial baxımdan qəbul olunur, həm də insanın daxili narahatlığını gizlədir. Burada diqqət çəkən məqam odur ki, münasibətlərdə əsas çətinlik uyğun insanın olmaması deyil, emosional yetkinliyin yetərli səviyyədə olmamasıdır; özünü tanımayan, sərhədlərini bilməyən, nə istədiyini dəqiq müəyyən etməyən biri üçün qarşısına kim çıxsa belə uyğun görünməyəcək".
Psixoloq, əlavə edib ki, sağlam münasibət axtaran insan qarşı tərəfi kateqoriyalara bölməz, onu şəxsiyyət kimi dəyərləndirər və bu yanaşma olanda “tapmaq çətindir” fikri yerini “tanımaq zaman istəyir” düşüncəsinə verir:
" Buna görə belə açıqlamaları təkcə bir cinsin problemi kimi yox, bütövlükdə münasibət mədəniyyətinin dəyişməsi kimi oxumaq daha real və ədalətli yanaşmadır".
Fatimə Məmmədova
10:52 19.02.2026
Oxunuş sayı: 582
