Ermənistandan zorla çıxarılmış azərbaycanlılar ədalət istəyir
Dekabrın 5-i Qərbi azərbaycanlıların 1987-1991-ci illərdə Ermənistandan qanunsuz şəkildə deportasiya edilməsinin anım günü kimi qeyd olunur. Bu deportasiya hadisəsi Azərbaycanın tarixində dərin iz buraxıb və minlərlə insanın öz doğma torpaqlarından zorla köçürülməsi ilə nəticələnib.
Ermənistanın vaxtilə öz havadarlarına güvənərək atdığı qanunsuz addımlar bu gün Azərbaycan Respublikası tərəfindən beynəlxalq hüquq çərçivəsində ardıcıl şəkildə həll olunur. Yol verilmiş qanunsuzluqların aradan qaldırılması istiqamətində uğurlu addımlar atılır, dünya ictimaiyyəti isə bu məsələlərə getdikcə daha diqqətli yanaşma göstərir.
Prezident İlham Əliyevin rəhbərliyi ilə həyata keçirilən düzgün siyasi addımlar tarixi dədə-baba torpaqlarımızı tələb etməyə və oradakı hüquqlarımızı bərpa etməyə möhkəm əsas yaradır. Onun qətiyyətli mövqeyi Azərbaycanın milli maraqlarını beynəlxalq müstəvidə müdafiə etməyə şərait yaradıb.
Bu gün də Qərbi Azərbaycan İcması tərəfindən “Qayıdış hüququ – Ermənistandan zorla çıxarılan azərbaycanlılar üçün ədalətin təmin edilməsi” mövzusunda 51 ölkədən 100-dən çox nümayəndənin iştirakı ilə beynəlxalq konfrans keçirilir.
Bu günün anlamı, Qərbi Azərbaycan, soydaşlarımızın doğma torpaqlarına qayıtması mövzusunda deputat Aydın Hüseynov Crossmedia.az saytına açıqlama verib:
"Bu gün dünyanın hər yerində müxtəlif millətlərin, xalqların nümayəndələri kompakt və yaxud səpələnmiş şəkildə yaşayırlar. İnsanlara qarşı milli, dini mənsubiyyətinə görə ayrıseçkilik etmək heç bir ölkədə normal hal kimi qəbul edilmir, əksər hallarda isə cinayət məsuliyyəti yaradır. Bir-biri ilə tarixi ədavət, hətta müharibə şəraitində olmalarına baxmayaraq İsraildə ərəblər, Rusiyada ukraynalılar, Ukraynada ruslar, Türkiyədə yunanlar, o cümlədən Azərbaycanda ermənilər heç bir təzyiqə məruz qalmadan yaşayırlar. Sivil ölkələrdə bu, məhz belə qəbul edilir. Elə ölkələr də var ki, oranın monoetnik tərkibi var, yəni əhalinin 99 faizi eyni millətə aiddir. Belə ölkələrdən biri və birincisi Ermənistandır”.
Milli Məclisin deputatı deyib: "Qərbi Azərbaycan İcmasının “Qayıdış hüququ: Ermənistandan zorla çıxarılmış azərbaycanlılar üçün ədalətin təmin edilməsi” mövzusunda Bakı şəhərində təşkil etdiyi II beynəlxalq konfransda da bu məsələ barəsində danışılıb: “Bu gün dünyana öz evindən, yurdundan zorla qovulan, köçürülən insanların sayı 120 milyondur. Bu rəqəmin 1 milyondan artığı da qədim Azərbaycan torpaqlarında yaradılmış Ermənistan adlı dövlətin ərazisində 1991-ci ilə qədər yaşamış azərbaycanlılardır. Ermənistan dövlətinin tolerantlıqdan uzaq, şovonist siyasəti nəticəsində öz evindən qovulan soydaşlarımız bu gün bütün dünya ölkələrindən öz haqlarını tələb edirlər, tapdanmış hüquqlarının bərpasını istəyirlər. Bəzən ermənilər bunu Azərbaycanın Ermənistana ərazi iddiası kimi təqdim etməyə çalışırlar. Amma, Ermənistan adlanan dövlətin ərazilərində min illər boyu yaşamış bir xalqın haqlı tələbinə beynəlxalq təşkilatlar, bəzi dövlətlər adekvat reaksiya vermək istəmirlər. Necə olur, Azərbaycanın müxtəlif bölgələrində, paytaxt Bakıda, iri şəhərlərimizdə milliyyətcə erməni olanlar heç bir ayrıseçkilik olmadan yaşaya, digər vətəndaşlar kimi bütün hüquqlardan istifadə edə bilirlər, amma öz yurdlarına dönmək istəyən azərbaycanlılara müxtəlif bəhanələrlə rədd cavabı verirlər. Əlbəttə, BMT-nin İnsan Hüquqları üzrə Ali Komissarlığı, ATƏT yanında İnsan Haqları Bürosu məsələyə münasibət bildirməli, azərbaycanlıların pozulmuş haqlarının bərpa olunmasında soydaşlarımıza dəstək olmalı, Ermənistana beynəlxalq hüququn gücünü göstərməlidirlər”.
Azərbaycanın bu cür təşviqat və təbliğat məsələlərinə ciddi yanaşması problemin gündəmdə qalmasına və beynəlxalq ictimaiyyətin diqqətində olmasına zəmin yaradır. Bu istiqamətdə fəaliyyət daha da gücləndirilməlidir. Sözügedən mövzuda Prezident İlham Əliyevin gördüyü işlər hər bir azərbaycanlı üçün əsl nümunədir. Onun qərəzli sualları cavabsız qoymaması və ölkəmizin mövqeyini beynəlxalq hüquq çərçivəsində qətiyyətlə müdafiə etməsi Azərbaycanın haqlı mövqeyini dünyaya daha aydın şəkildə çatdırmağa şərait yaradıb.
Ayhan Ağarzayev
16:53 05.12.2024
Oxunuş sayı: 7787
