Lloyd Ostinin Yaponiyaya səfəri: Şimali Koreya və Çin əleyhinə ittifaq güclənir?
ABŞ müdafiə naziri Lloyd Ostin gələn həftə Yaponiyaya rəsmi səfər edəcək. Crossmedia.az xəbər verir ki, Ostin səfər çərçivəsində Yaponiya müdafiə naziri Gen Nakatani və baş nazir Şigeru İşiba ilə görüşlər keçirəcək. Söhbət zamanı əsas müzakirə mövzularından biri Şimali Koreyanın artan təhdidləri və Çinin regionda genişlənən təsiri fonunda Yaponiya-ABŞ ittifaqının müdafiə siyasətinin yenidən təsdiqlənməsi olacaq.
Mövzu ilə bağlı "Atlas" Araşdırmalar Mərkəzinin rəhbəri, politoloq Elxan Şahinoğlu Crossmedia.az-a verdiyi açıqlamada qeyd edib ki, İkinci Dünya müharibəsindən sonra Yaponiya ABŞ-ın ən önəmli strateji müttəfiqlərindən birinə çevrilib. Hər iki ölkə uzun illərdir regionda təhlükəsizlik təminatçısı kimi birgə fəaliyyət göstərir. Hazırda isə əsas təhlükə Çindən gəlir.
E.Şahinoğlu bildirib ki, ABŞ Yaponiya adalarında hərbi mövcudluğunu daha da artırmağı planlaşdırır. Bu çərçivədə yeni hərbi təyyarələr və müasir texnika bölgəyə göndəriləcək. Eyni zamanda, Yaponiya da hərbi imkanlarını gücləndirməkdədir. "Böyük Yapon-Amerika Dialoqu" (BUAD) adı altında formalaşan təşkilat, bu ittifaqın daha da möhkəmləndirilməsinə xidmət edir.
Ekspertin fikrincə, həm Çindən, həm də Şimali Koreyadan ciddi nüvə təhdidi mövcuddur. Xüsusilə, Çinin Tayvanı ələ keçirmə planları region üçün təhlükə mənbəyidir. “ABŞ və Yaponiya, Çinin güc tətbiq etməklə Tayvanı birləşdirməsinə qarşı çıxır. Bu mövzuda iki ölkə arasında koordinasiya gücləndirilir,” – deyə Şahinoğlu fikrini yekunlaşdırıb.
Nihat Tahirov
16:30 04.12.2024
Oxunuş sayı: 16678
