Xüsusi xidmət orqanlarımızın peşəkarlığı sayəsində daha bir təxribatın qarşısı alındı 

Azərbaycan Respublikası öz müstəqilliyini əldə etdiyi gündən etibarən dövlət təhlükəsizliyini təmin etmək, milli maraqları qorumaq və xalqın rifahını yüksəltmək kimi mühüm vəzifələri uğurla həyata keçirir. Bu sahədə Dövlət Təhlükəsizliyi Xidməti (DTX), Xarici Kəşfiyyat Xidməti (XKX), o cümlədən digər güc strukturlarımız Azərbaycanın gücünün, iradəsinin və strateji düşüncə tərzinin ən bariz təzahürüdür. Bu qurumlarımız yüksək peşəkarlıqla fəaliyyət göstərərək ölkəmizin daxili və xarici təhlükəsizliyini təmin edir. Bu xidmətlərin hər biri Azərbaycanın suverenliyinə və təhlükəsizliyinə yönələn istənilən təhdidə qarşı mübarizədə əvəzsiz rol oynayır. Onların peşəkar yanaşması və dövlətə sədaqət prinsipləri sayəsində Azərbaycan güclü, təhlükəsiz və dayanıqlı dövlət olaraq regionda öz sözünü deyir. DTX və XKX-in uğurları, dövlətimizin gücünün əsas təməllərindən biridir və Azərbaycanın sabit gələcəyinə zəmanət verir.

Azərbaycan beynəlxalq arenada nüfuzunu artırdıqca ölkəmizə qarşı atılan qərəzli addımlar da çoxalır. Lakin bizə qarşı atılan istənilən terror addımı əks əməliyyat nəticəsində məhv edilir və bununla bağlı hüquq-mühafizə orqanlarımız tərəfindən operativ tədbirlər görülür.

Bu günlərdə xarici ölkə vətəndaşının Azərbaycanda terror-təxribat əməli törətmək istədiyi, lakin xüsusi xidmət orqanlarımızın peşəkarlığı nəticəsində zərərsizləşdirildiyi haqqında məlumat yayıldı. Əcnəbi şəxsin planlaşdırdıqlarını gerçəkləşdirməsi ölkəmizə çox böyük zərbə vura, Azərbaycan dövlətinin nüfuzunu sarsıda bilərdi. Lakin o, ona bu planı təqdim edənlər, yönləndirənlər istəklərinə çata bilmədilər. 

Məsələ ilə bağlı Milli Məclisin Müdafiə, təhlükəsizlik və korrupsiya ilə mübarizə komitəsinin sədri Arzu Nağıyev Crossmedia.az saytına açıqlamasında bildirib:

"Ümumiyyətlə, xüsusi xidmət orqanları istənilən dövlətin əsas sütunlarından biridir. DTX təmsilçiləri peşəkar bir şəkildə əks-kəşfiyyat fəaliyyəti ilə məşğuldur. Amma dövlətin təhlükəsizliyi geniş anlayışdır və yalnız xarici kəşfiyyata qarşı görülən tədbirlərlə məhdudlaşmır. Bu təhlükəsizlik konsepsiyasına terrorla mübarizə, həyati vacib obyektlərin qorunması, iqtisadi təhlükəsizlik, təhsil, səhiyyə, ekoloji məsələlər və digər sahələr daxildir".

Həmçinin deputat Arzu Nağıyev qeyd edib:

"Eyni zamanda qeyd etmək istərdim ki, dini radikalizmlə bağlı olan bütün terror təşkilatçıları milli və dövlət təhlükəsizliyinə təhdidin bir növüdür. Bu təşkilatların maliyyə mənbələrinin kəsilməsi və fəaliyyətlərinin kökündən məhv edilməsi vacibdir. Bununla yanaşı, İslam dəyərlərinə hörmətlə yanaşmaq və cəmiyyətdə tolerantlıq mühitini qorumaq da əhəmiyyətlidir. İstər müxtəlif dövlətlərdə baş verən son hadisələr, humanizmlə özbaşınalığın səhv salınması və xüsusi xidmət orqanlarının yarıtmaz işlərinin təzahürünün  nə ilə nəticələnə biləcəyini ortaya qoyduq. Yəni bu gün kimlər hansı işlərlə məşğuldur göz qabağındadır. Dövlət və dövlətçiliyə qarşı yönələn istənilən aqressiyaya qarşı mübariz aparmaq lazımdır".

İkinci Qarabağ müharibəsində xüsusi xidmət orqanlarının fəaliyyətindən danışan Arzu Nağıyev qeyd edib:

"44 günlük Vətən müharibəsində də DTX, istər Xarici Kəşfiyyat İdarəsi, istərsə də Hərbi Əks-Kəşfiyyat İdarələri çox mühüm addımlar atdı. Düşmənin dislokasiyasından tutmuş, müxtəlif istiqamətlərdə təxribatların qarşısını almağa qədər bir çox strateji əməliyyatlar həyata keçirildi. Eyni zamanda, digər dövlətlərin xüsusi xidmət orqanlarının agentura şəbəkəsindən istifadə edərək təxribat törətmək istəyən şəxslər ifşa edildi və həbs olundu. Azərbaycan daxilindən ermənilərə meyilliliyin qarşısını almaq üçün çox ciddi əks əməliyyat fəaliyyəti həyata keçirilir. Bu gün hər bir Azərbaycan vətəndaşı əminliklə deyə bilər ki, onun haqqını, konstitusiya hüququnu qoruyan DTX kimi çox mühüm bir qurum var.

Bir məqamı da vurğulamaq lazımdır ki, terrorçular üçün "Azərbaycan" və ya "başqa dövlət" məfhumu yoxdur. Onlar üçüncü dövlətin ərazisində də öz məkrli planlarını həyata keçirməkdən çəkinmirlər. Sadəcə, adları və formal strukturlaşmaları fərqlidir. Şimal sərhədlərinə yaxın ərazilərdə və cənubda buna bənzər eyni məramlı qurumlar mövcuddur.

Düşünürəm ki, Ali Baş Komandanın qətiyyətli və dönməz xarici və daxili siyasəti çərçivəsində atılan hər bir addım Azərbaycan xalqının rifahına, suverenliyinin və təhlükəsizliyinin qorunmasına xidmət edir”.

Ayhan Ağarzayev