"Media savadlılığı" kitabı satışa çıxarılıb
"Media savadlılığı" kitabı satışa çıxarılıb.
Crossmdia.az xəbər verir ki, informasiya cəmiyyətinin əsas xüsusiyyətlərindən biri bilginin sürətli istehsalı və dövriyyəsidir. Bu proses bir tərəfdən məlumatlara çıxışı asanlaşdırsa da, digər tərəfdən dezinformasiya, manipulyasiya və yönləndirilmiş məzmunların artmasına zəmin yaradır. Belə bir şəraitdə medianın iş prinsiplərini anlamaq, informasiyanı tənqidi şəkildə qiymətləndirmək və ictimai rəyin formalaşma mexanizmlərini dərk etmək elmi və ictimai baxımdan zəruri məsələyə çevrilmişdir. Məhz bu ehtiyac kontekstində Bakı Dövlət Universitetinin Jurnalistika fakültəsinin dosenti Könül Niftəliyeva və jurnalistika üzrə fəlsəfə doktoru Maral Nəcəfli tərəfindən hazırlanan “Media Savadlılığı” kitabı MİMTA Yayımları tərəfindən nəşr olunaraq oxuculara təqdim edilmişdir.
Kitab media savadlılığını yalnız terminoloji və ya normativ çərçivədə deyil, geniş nəzəri baza və tətbiqi analizlər əsasında sistemli şəkildə izah edir. Əsərdə kütləvi kommunikasiya nəzəriyyələrinin tarixi inkişaf mərhələləri, medianın təsir gücünə dair klassik və müasir yanaşmalar, gündəmin müəyyən edilməsi, çərçivələmə, səssizlik spiralı, informasiya boşluğu, asılılıq və yetişdirmə nəzəriyyələri elmi ardıcıllıqla təhlil edilir. Bununla yanaşı, Frankfurt Məktəbi, mədəniyyət tədqiqatları, ideoloji və texnoloji determinizm yanaşmaları medianın cəmiyyətlə münasibətlərini anlamaq baxımından dərin analitik çərçivə yaradır.
Əsərin mühüm elmi dəyəri media savadlılığı anlayışının çoxölçülü şəkildə təqdim olunmasıdır. Müəlliflər savadlılıq fenomenini vizual, informasiya, rəqəmsal, texnologiya və media savadlılığı kontekstində izah edərək, bu anlayışın müasir təhsil sistemində və gündəlik informasiya istehlakında tutduğu yeri əsaslandırırlar. Media savadlılığı təhsilinə həsr olunan bölmələrdə qoruyucu, gücləndirici, tənqidi və analitik yanaşmalar elmi əsaslarla şərh edilir, ABŞ, Kanada, Avropa ölkələri, Finlandiya və Türkiyə təcrübələri müqayisəli şəkildə araşdırılır.
Kitabın son fəsilləri medianın praktiki fəaliyyətinə yönəlmiş tənqidi təhlillərlə seçilir. Xəbərlərin hazırlanma prosesinə təsir edən amillər, media mətnlərində rast gəlinən problemlər, reklam və propaqandanın gizli təsir mexanizmləri diskurs və semiotik analiz metodları əsasında konkret nümunələr üzərindən izah olunur. Bu yanaşma oxucunun media məzmununu yalnız qəbul edən deyil, onu dərk edən və sorğulayan subyekt kimi formalaşmasına xidmət edir.
“Media Savadlılığı” kitabı jurnalistika, kommunikasiya və sosial elmlər üzrə təhsil alan tələbələr, müəllimlər və tədqiqatçılar üçün etibarlı akademik mənbə olmaqla yanaşı, media ilə gündəlik təmasda olan geniş oxucu auditoriyası üçün də praktik bələdçi funksiyasını daşıyır. MİMTA Yayımları tərəfindən nəşr olunan bu əsər müasir informasiya mühitində tənqidi düşünmə mədəniyyətinin formalaşdırılmasına mühüm elmi və ictimai töhfə kimi qiymətləndirilə bilər.
13:50 10.02.2026
Oxunuş sayı: 425
