Gündəm

Azərbaycan Afrikaya sərmayə yatıracaq? - AÇIQLAMA

Qvineya-Bisau Respublikası Azərbaycanı Afrika qitəsində iqtisadi əməkdaşlığı genişləndirməyə və sərmayə yatırmağa çağırıb. Bu barədə Qvineya-Bisaunun xarici işlər, beynəlxalq əməkdaşlıq və icmalar naziri Karlos Pinto Pereira Bakıda keçirilən mətbuat konfransında bildirib. O, Azərbaycan xarici işlər naziri Ceyhun Bayramovu ölkəsinə dəvət edərək iki ölkə arasında əlaqələrin daha da güclənməsi üçün platforma yaratmaq istədiklərini vurğulayıb.

Mövzu ilə bağlı Crossmedia.az-a danışan Milli Məclisin deputatı Vüqar Bayramov Afrikada investisiya mühitinin son illərdə əhəmiyyətli dəyişikliklərə məruz qaldığını bildirib. Onun sözlərinə görə, əvvəllər xarici investorlar üçün cəlbedici olmayan bu qitə, indi ciddi investisiya axını ilə diqqət çəkir. Xüsusilə Çin və digər inkişaf etmiş ölkələr bu regiona yönəlmiş sərmayələrini artırır.

Deputat qeyd edib ki, Azərbaycan üçün də xarici investisiya bazarına çıxış və daha çox xarici sərmayə cəlb etmək strateji əhəmiyyət daşıyır. "Azərbaycan həm yaxın region ölkələri, həm də uzaq ölkələrlə iqtisadi əlaqələrini genişləndirməkdə maraqlıdır. Afrika kimi böyük əhali potensialına və geniş bazara malik olan qitələrdə fəaliyyət göstərmək Azərbaycan üçün mühüm imkanlar yarada bilər," – deyə o bildirib.

Vüqar Bayramov vurğulayıb ki, digər ölkələrdə investisiya qoyuluşları həyata keçirərkən bazar şəraitinin yaxşı öyrənilməsi və düzgün strategiyaların tətbiqi vacibdir. Afrikanın investisiya mühitini yaxşılaşdırmaq istiqamətində atdığı addımlar onun qlobal kapital axınından daha çox pay almasına şərait yaradır.

Ekspertin fikrincə, Azərbaycan da bu fürsətləri dəyərləndirərək Afrika ölkələri ilə iqtisadi əlaqələrini dərinləşdirə bilər. "Azərbaycanda xarici investisiya portfelinin genişləndirilməsi istiqamətində görülən işlər, həmçinin bu əməkdaşlıqların hər iki tərəf üçün faydalı olacağına işarə edir," – deyə o fikrini yekunlaşdırıb.

Afrika ilə iqtisadi əlaqələrin möhkəmləndirilməsi Azərbaycanın qlobal iqtisadi müstəvidə mövqeyini gücləndirməklə yanaşı, yeni bazarlara çıxışı təmin edə bilər. Qvineya-Bisaunun təklifi bu istiqamətdə yeni bir mərhələnin başlanğıcı ola bilər.