Qarabağın azadlığı və yenidən qurulmasının memarı – İlham Əliyev
Uzun illərdir həsrətində olduğumuz Qarabağ, 2020-ci ildə baş verən 44 günlük Vətən müharibəsinin nəticəsində işğaldan azad edildi. Bu tarixi zəfər Azərbaycan Respublikasının Prezidenti, müzəffər Ali Baş Komandan İlham Əliyevin düzgün və uzaqgörən siyasəti, eləcə də şücaətli Azərbaycan Ordusunun igidliyi sayəsində mümkün oldu. Qarabağın azad edilməsi təkcə hərbi qələbə deyil, həm də milli qürur və ədalətin bərpası idi.
Erməni işğalı dövründə Qarabağ torpaqları erməni vandalizmə məruz qaldı. Şəhərlərimiz xarabalığa çevrildi, məscidlərimiz donuz və digər heyvanların saxlanıldığı yerlərə çevrilərək təhqir edildi. Tarixi və mədəni abidələrimiz məhv edildi, kəndlərimiz yandırıldı. Bu cinayətlər yalnız Azərbaycan xalqına deyil, ümumbəşəri mədəni irsə qarşı edilmiş vandalizm aktları idi. Bu əməllər beynəlxalq hüquq normalarına və humanitar prinsiplərə tamamilə zidd olsa da, Ermənistanın beynəlxalq hüququn norma və prinsiplərinə qarşı çıxmasının artıq bir ənənəyə çevrildiyini gördük.
Qarabağın işğaldan azad edilməsi və onun yenidən qurulması Azərbaycan xalqının qələbəsi ilə yanaşı, Prezident İlham Əliyevin tarixi missiyasını bir daha təsdiqlədi. Bu zəfər həm də gələcək nəsillərə Qarabağın əbədi olaraq Azərbaycan torpağı olduğunu xatırladan bir örnəkdir.
Prezident İlham Əliyevin Qarabağa qayıdışla bağlı siyasətindən danışan millət vəkili Aydın Mirzəzadə Crossmedia.az-a açıqlamasında bildirib:
"Torpaqlarımızın erməni işğalından azad edilməsi Prezident İlham Əliyevin uğurlu daxili və xarici siyasətinin nəticəsidir. O, "Böyük Qayıdış" layihəsi ilə azad edilmiş torpaqların bərpası və məcburi köçkünlərin öz dədə-baba yurdlarına qayıtması üçün strateji plan hazırlamışdır. Prezident çıxışlarında qeyd etdiyi kimi, azad edilmiş ərazilərdə "Ağıllı kənd" layihələri icra edilir, iş yerləri açılır və sosial rifah təmin olunur.
Erməni vandalizmi nəticəsində tamamilə dağıdılmış ərazilərdə infrastruktur, təhsil, sağlamlıq və mədəni obyektlər sürətlə bərpa edilir. Artıq iki beynəlxalq hava limanı istifadəyə verilmiş, Şuşa, Laçın və digər bölgələr beynəlxalq tədbirlərə ev sahibliyi etməyə başlamışdır. Qarabağda möhtəşəm quruculuq və abadlıq işləri davam edir. Azərbaycan bu məsələdə dünyanı heytərləndirməkdədir.
Bütün bu nailiyyətlər İlham Əliyevin uzaqgörən siyasətinin və milli maraqları qorumaq istiqamətindəki qətiyyətli addımlarının bariz nümunəsidir. Gələcəkdə də biz bu istiqamətdə yeni layihələrin, uğurlu çalışmaların şahidi olacağıq".
Ayhan Ağarzayev
14:21 03.12.2024
Oxunuş sayı: 19017
