Partiya sədri: Qarabağda bu işlərin görülməsinə ciddi ehtiyac var
Qarabağa köç, insanların bu ərazilərə qayıtması, postmüharibə dövrünün ən vacib məsələlərindən biridir. Azərbaycan dövləti və vətəndaşları, illərdir işğal altında olan torpaqların azad edilməsi ilə bağlı böyük bir əzm və həvəs nümayiş etdirərək bu məqsədə çatdılar. İndi isə azad edilən ərazilərdə yenidən həyat qurulması, infrastrukturun bərpa edilməsi və insanların öz torpaqlarına dönməsi prosesləri davam edir. Bu prosesin bir hissəsi olaraq, Cəbrayıl, Laçın və digər bölgələrə köçlərin təşkili, həmçinin yerli əhalinin məşğulluğu, torpaq sahələrindən istifadəsi və yaşayış şəraitinin yaxşılaşdırılması əsas məsələlərdəndir.
Mövzu ilə bağlı Crossmedia.az-a açıqlama verən Azad Vətən Partiyasının sədri Akif Nağı Qarabağda baş verən bu mühüm dəyişikliklərdən və inkişafdan söhbət açıb:
"Qarabağa köç, insanların qayıtması vacib bir məsələ və mərhələdir. Bu bütün rayonlar üzrə davam edir. Cəbrayıla, ondan əvvəldə də digər bölgələrə, gələn il də inşallah Ağdam istiqamətinə köç başlayacaq. Rəsmi məlumatlara görə Ağdamda ən azı 3 kənddə yüzlərlə ev tikilib və köçə hazırdır. Xıdırlı kəndi, Sarıcalı kəndi və bir neçə kəndlərdə də tikinti işləri görülür. Biz bunu hərtərəfli dəstəkləməliyik. Cəbrayıla köçənlərlə və digərləri ilə də əlaqəmiz var. Hamı razıdır. O vaxt da hamı deyirdi ki, təki torpaqlar azad olunsun biz daxmada da yaşayarıq. İndi də həmin həvəsli insanlar o torpaqlarda yaşayırlar.
Çoxlu xərclərin qarşısında üstəlik köçkünlərini də geri qaytarmaq hər dövlətin gücü çatmayan işdir. Suqovuşandan tutmuş Cəbrayıla, Zəngilana qədər işğaldan azad olunan hər yerə köçlər gedir. Mən bu il Laçında insanların ev şəraitlərini gördüm. Onlar üçün çox yüksək səviyyədə şərait yaradılıb".
Eyni zamanda partiya sədri Qarabağda insanların rastlaşdığı problemlərdən də danışıb:
"Ən vacib problem iş problemidir. İş yerləri həddindən artıq azdır. Məktəb, uşaq baxçası, həkim məntəqəsi və bu tipli yerlərdə insanlar işləyirlər, yerdə qalanlar isə harada işləsinlər bilmirlər. Əvvəl gedəndə onlara müəyyən bir vəsait ayrılırdı. O vəsaiti də 1-2 ay verib dayandırırlar. Başqa problem demək olar ki, yoxdur. Hər şey qaydasındadır. İnternet, su, qaz, işıq hamısı yerindədir.
İkinci məsələ isə ondan ibarətdir ki, orada məskunlaşanlar kənd təəsərrüfatına öyrəşən insanlardır. Kənd təsərrüfatı, heyvandarlıq, əkinçiliklə məşğul olmaq üçün sahələrin ayrılmasına çox ciddi ehtiyac var. Orada torpağın icarəsi ilə bağlı prezidentin sərənacamı da oldu. Onu geniş şəkildə məmur maneçiliyi olmadan həyata keçirməyə ehtiyac var".
A.Nağı insanlara pay torpaqlarının ayrılması ilə bağlı vaxtın çatdığını bildirib:
"Pay torpaqları insanlar arasında bölünməlidir. Düzdür bunun da çətinlikləri var. Torpaqların hamısı hələ minalardan təmizlənməyib. Digər obyektiv, subyektiv amillər də var. Amma artıq insanlar pay torpaqlarının nə qədər olacağını, hansı sahədə olacağını bilməlidirlər. Bu istiqamətdə işlər görülməlidir. Bütövlükdə həddindən artıq müsbət tendensiya gedir.
Fərdi evlərin tikilməsi ilə bağlı yanaşmada müəyyən yenilik olmalıdır. Hakimiyyət də artıq bununla bağlı düşünür. Hələlik bina evləri də, müəyyən böyük obyektlər də, fərdi evlər də dövlət tərəfindən tikilir. İndi isə insanların içərisində də bir həvəs yaranıb ki, öz evlərini özləri tiksinlər. Dövlət tərəfindən fərdi evlərin tikilməsinə xərc onsuz da çəkilir. Həmin vəsait ayrı-ayrı fərdlərə ayrılsın. Plan əsasında hər kəsin yeri müəyyənləşsin. Küçələr də, onların kəsişmə yerləri də, torpaq və həyətyanı sahələr də müəyyənləşsin. Bir tərəfdən dövlət tiksin, o biri tərəfdən insanlar da özlərinə ev tiksinlər. Bu həm insanların arzusunu yerinə yetirəcək, eyni zamanda isə tikinti işlərini sürətləndirəcək".
Banuçiçək Kalbalıyeva
04:24 02.12.2024
Oxunuş sayı: 26585
