Böyük Britaniya Ukrayna ilə müdafiə əməkdaşlığını genişləndirir
Böyük Britaniyanın müdafiə naziri Con Gilli Kiyev səfəri çərçivəsində Ukrayna Baş naziri Denis Şmyqal ilə “yol xəritəsi”ni imzalayıb. Bu sənəd, əvvəlcədən razılaşdırılmış 100 illik müdafiə tərəfdaşlığının inkişafını nəzərdə tutur, Şmyqal öz sosial media hesabında bildirib.
Crossmedia.az bu barədə xarici mediaya istinadən xəbər verir. “Yol xəritəsi” 2026-cı ildə təhlükəsizlik sahəsində əsas prioritet istiqamətləri əhatə edən müdafiə əməkdaşlığını rəsmiləşdirir və genişmiqyaslı birgə layihələrin reallaşdırılmasına yol açır.
Görüş zamanı Ukrayna tərəfi britaniyalı həmkarına gecə baş vermiş genişmiqyaslı Rusiya hücumunun nəticələri barədə məlumat verib və hava hücumundan müdafiə sistemlərinin gücləndirilməsi və onların ehtiyat mərmilərlə təmin edilməsinin əsas prioritet olaraq qalmasını vurğulayıb.
Şmyqal bildirib ki, Böyük Britaniya artıq Ukraynanın müdafiə qabiliyyətinə əhəmiyyətli töhfə verib və imzalanan “yol xəritəsi” yaxın illərdə əməkdaşlığı daha da gücləndirəcək.
Sənəd, həmçinin Kiyev-London tərəfdaşlığını strateji səviyyədə möhkəmləndirərək, Ukraynanın müdafiə potensialının artırılmasına və regional təhlükəsizlik əməkdaşlığının genişlənməsinə xidmət edəcək.
Sevinc Yarməmmədova
20:05 09.01.2026
Oxunuş sayı: 1250
